Lafaek News—Prezidente Konsellu Imprensa, António Maria da Conceição, afirma instituisaun media iha Timor Leste, la’os de’it observador b alia-loos, maibé defensor ativu ba lia loos hodi kombate informasaun falsu iha públiku.
Prezidente Konsellu Imprensa hatoo asuntu ne’e iha konferénsia nasional estabelesimentu estrutura aliansa verifikdor faktus hodi kombate informasaun hoax no des-informasaun iha rai-laran.
“Instituisaun media sira iha Timor-Leste la’os de’it observador ba lia-loos, maibe defensor ativu ba lia-loos, iha era plataforma dijital ne’ebé desinformasaun aumenta buras tanba polítiku, tanba ekonomia no tanba buat sira seluk, media tenki hamriik iha fileira oin kedas hodi kombate lia falsu no lia loos instituisaun sira núdar vizaun ba lia loos, hatudu faktu ne’ebé verifikadu no tane as jornalismu étika mak sei tulun kria no tulun ambiente sosiedade ne’ebe bem-informadu no bele rejiste hasoru informasaun falsu sira, konferensia ida ne’e dedika formalizasaun aliansa estrutura sira nu’udar pasu signifikativu ida ba oin,” Antonio da Conceição Moniz Mali hatoo asuntu ne’e iha nia diskursu iha salaun KI kintal Boot, 09 Julio 2025
Iha fatin hanesan, Sekretaria Estadu Komunikasaun Sosial (SEKOMS), Expedito Dias Ximenes, mos haktuir desinformasaun mak sai hanesan venéno no sai ameasa ba iha siguransa nasional tan de’it informasaun falsu, tan ne’e papel media importante iha nasaun soberania hodi servisu ba informasaun lia-loos ba publiku nia interese.
“Ita akompaña sirkulasaun lia-bosok oi-oin ne’ebé ita bolu dehan informasaun falsu ka desinformasaun, fact News, Hoax no iha mos diskursu ódio, ne’e sai venéno mos ba ita nia Demokrasia no-mos bele mos sai ameasa ba siguransa nasional tanba informasaun falsu, Ita presija koñesimentu abilidade públiku atu nune’e sidadaun idak-idak bele rekoñese informasaun loos no la loos.” Expedito sublina.
Iha konferénsia nasional ne’e hetan partisipasaun husi estudante Universitáriu sira hanesan UNTL Komunikasaun Sosial, IPB Betano, UCT sei ko’alia kona-ba kombate informasaun hoax no desiformasaun ne’ebé buras iha rai-laran UNESCO mos sei apoiu Konsellu lmprensa ba atividade workshop iha ne’ebé sei realiza iha tempu badak .
Jornalista :Maria José/Jonaida Corte Real
