Lafaek News— Ministra Edukasaun, Dulce de Jesus Soares, lihusi entrevista esplika, programa prioridade Ministériu Edukasaun iha governu da-sia mak Ministériu Edukasaun kontinua iha nível ensinu, Edukasaun Pre-Eskolár, Ensinu Báziku, Ensinu Sekundáriu Tékniku Vokasionál no-mós programa sira seluk hodi apoiu ba programa prosesu aprendizajen atu bele la’o ho di’ak hodi hadi’a kualidade edukasaun iha Timor Leste.
Ministra Edukasaun hatoo asuntu ne’e hafoin partisipa iha jornada orsamentu 2024, iha auditórium Xanana Room, Torre Ministériu Finansas Aitarak-Laran.
Iha sorin seluk, iha abertura jornada orsamentu tinan 2024 ne’e, Primeiru Ministru Kay Rala Xanana Gusmão dehan, edukasaun kontinua hanesan prioridade ida ba governu, tanba futuru Timor-Leste, nian iha joven sira-nia liman, tanba ne’e responsabilidade atu fó ba sira kompeténsia ho kuñesimentu nesesáriu atu sira bele hetan susesu.
“Investimentu iha edukasaun aléinde aumenta kapitál umanu sei kontribui mós hodi reduz taxa dezempregu no pobreza, tanba ne’e sei konsentra hadia kualidade edukasaun, iha promosaun, formasaun profissionál no iha garantia oportunidade ne’ebé hanesan ba ema hotu-hotu, la haree ba sira-nia orijen ka lokalizasun jeográfika,” dehan Xefe Governu Kay Rala Xanana Gusmão.
Primeiru Ministru Kay Rala Xanana Gusmão husu atu implementasaun ho susesu husi orsamentu 2024, ne’e ezije kolabora ho envolvimentu husi parte hotu-hotu inklui governu, setór privadu, organizasaun husi sosiedade sivil no sidadaun sira hotu kontinua servisu hamutuk atu atinje futuru ida ne’ebé nabilan liu.
Jornalista : Felix Fernandes
Editor : Agapito de Deus
