Lafaek News–Diretór Fundasaun MAHON, Angelo Fernando Ximenes, husu partidos polítiku sira labele uza de’it joven sira iha tempu kampañia hodi atinje sira nia objetivu atu ukun no hetan tiha benefísiu haluha tiha joven.
Tanba esperiénsia tinan 20 resin ona maioria juventude Timor-Leste haksoit hotu ba rai liur buka servisu tamba servisu iha rai laran laiha tantu atu halo de’it masa (buruh kasar) tebe-tebes mos laiha.
Konfrontru entre militantes partidu polítiku sira, tuda malu, trata malu no rai odiu ba malu, maibé to ikus depois de hetan fiar no ukun lideres partidu polítiku sira la konsidera joven sira nia nia luta durante kampañia hodi lori vitoria ba sira” hateten Diretor Mahon iha nia knaar fatin Ex-Heliport Bairo-pite Dili kinta 10/03/2022.
Iha tempu kampañia, polítiku sira uza juventude sira harame sira nia palku, mobiliza joven husi fatin ida ba fatin seluk no pinta-an tun sa’e hakilar viva! maibé liu tiha eleisaun joven sira fila-fali ba situasaun normal.
Ami husu ba partidu polítiku sira atu labele aproveita de’it joven sira iha tempu kampañia, tanba ami haree iha kampañia durante ne maioria joven barak mak partisipa no dalaruma militantes sira hetan dezastre hanesan,’’ dehan nia.
Diretór Fundasaun MAHON, ne’e mòs husu ba joventude sira iha Timor-Leste atu foka ba ida-idak nia aktividade prioritaria hodi sustenta moris lor –loron no akompaña deit kampaña iha media sira.
Ha’u mòs husu no sugere ba joventude sira iha Timor-Leste atu foka ba ida-idak nia atividade prioritaria sira hanesan asesu ba edukasaun, estuda/aprende, halo toos ou natar, dezenvolve kreatividade inovativa hodi kria servisu ba-an rasik no labele lakon tempu ba kampania ne’ebe dok husi ita nia hela fatin hodi redus konflitu no desastre no tur hakmatek iha uma husik politiku sira mak buka ita bot sira ou bele akompañia de’it notisia kampañia nian liu husi media hanesan radio, televizaun, internet no seluk-seluk tan depois iha loron eleisaun fo votu segredu ba lider ida ne’ebe mak ninia programa diak ba joven sira, ba nasaun no ba assuntu dezenvolvimentu sira seluk, Labele tanba de’it ema influénsia no tuir fali ema seluk tanba o nia votu ida segredu ne’e bele deside nasaun nia di’ak iha tinan lima oin mai”. Nia Hakotu.
Jornalista : João da Costa Soares
Editor : Agapito de Deus
