Lafaek News-Miliantes partidu FRETILIN husi Munisípiu Manatuto, Postu Administrativu Natarbora, Marcelino Soares deklara postu administrativu neen kompostu husi Lalea, Manatutu Vila, Natarbora, Laklubra, Laklo no Soibada garante kandidatu númeru sorteiu 6 Francisco Guterres Lú Olo sei manán iha eleisaun Prezidensiál ba periodu 2022-2027.
Militante Marcelino Soares optimista bainhira partisipa kampañia kandidatu número sorteiu 6, Francisco Guterres Lú Olo ba dala-9 iha Munispiu Manatuto kampu Merkadu tuan kuarta ne’e, hodi dehan se Lú Olo mak la manan iha Manatutu troka tiha nia naran.
Ami husi postu administrativu neen hanesan Postu Administrativu Natarbora, Soibada, Laklubar, Laklo no Laleia hamutuk katak ami garante Lú Olo sei mana iha Munisípiu Manatuto iha primeira ronde,” deklara Militante Marcelino Soares ba jornalista sira merkadu tuan iha Aldeia Sau, Suku Sau, Postu Administrativu Manatuto Villa, Munisípiu Manatuto, kuarta (09/03/2022).
Militante ne’e afirma, razaun hili nafatin Lú Olo tanba nia ema ida ne’ebé simples atu lori rai ida ne’e ba oin, tanba ne’e sei karik Lú Olo manán iha eleisaun ne’e karik keta haluha ami Manatuto oan hadia mak estrada, eletrisidade no bee moos.
Problema ne’ebé durante hasoru mak inundasaun 4 Abríl tinan 2021 ne’e estrada, too agora seidauk hadia ne’e mak husu ba kandidatu Lú Olo sai tan prezidente repúblika dala ida tan karik haree estrada ne’ebé kotu Suku Sikone Dinone baliza ho Vikeke tanba transporte públiku movimentu ba mai”, dehan Militante Marcelino.
Marcelino esplika, problema hirak ne’e hato’o tiha ona ba parte relevante, maibé ho pandémia ne’e mak agora seidauk hetan resposta.
Iha fatin hanesan, Ana Francisca Gomes husi Aldeia Sau, Suku Sau, Postu Administrativu Manatutu, Munisípiu Manatuto hatete sira garante kandidatu númeru sorteiu 6 sei manán iha Munisípiu Manatuto.
Ami sei garante kandidatu númeru sorteiu 6 Francisco Guterres Lú Olo sei manan iha Munisípiu Manatuto, razaun ami hili nafatin Lú Olo tanba ema ida ne’ebé simples no hakraik an husi simu desizaun saida de’it,” haktuir nia.
Kona-ba iha Manatuto ne’e mós Kay Rala Xanana Gusmao hili kandidatu Ramos Horta maibé demokrásia la haree ba Manatuto oan ka la’ós Manatuto oan ne’e depende povu ida-idak nia hakarak hili tanba ne’e hakarak ka lakohi kandidatu Lú Olo.
Se karik Lú Olo mak re-eleitu ba Prezidente Repúblika dala ida tan ami husu mak primeiru joven sira hakmatek no ami hakarak lori povu ba oin nune’e mós kria kampu traballu ba joven sira ida ne’e mak ami nia hakarak”.
Jornalista : Rita Moniz
Editor : Agapito de Deus
