Lafaek News-Traballadór Timór-Oan ne’ebé mout iha tasi Wando, tanji Pe, Korea do Súl, Polísia Maritíma Korea Súl buka durante loron tolu ona, maibé seidauk hetan nia isin lolon.
Tuir fontes husi traballadór iha Korea Súl, Pedrito hatete, durante loron tolu ona polísia Maritíma Korea buka husi kuarta feira tuku 12 oras korea Súl, to’o agora ne’e seidauk hetan nia isin lolon.
“Polisía maritíma buka ona kolega ne’e, durante loron tolu ona, husi kuarta feira tuku 12:45 oras koreanu, to’o agora ne’e seidauk hetan, tanba tuir lei korea Súl nian, to’o de’it loron tolu mais kuandu buka loron tolu mak la hetan ne’e husik ona,” dehan traballadór Timór-Oan iha Korea Súl, Pedrito Murak Bareto, ba lafaeknews.com liuhusi via Whatsapp, Sesta (26/03/2021).
Nia haktuir, durante loron tolu mak la hetan ne’e sei la buka tan ona, singifika lakon ona, maibé se adidu traballadór Timor Leste ba Korea Súl rekomendasaun maka’as entaun sei bele aumenta tan, no ita husu ba maromak para loron aban ho bainrua polisía maritima sira bele buka tan kolega ne’e no bele hetan.
Tan ne’e, husu ba família sira iha Timor Leste liuliu iha Bobonaru atu bele halo tuir kultura no hasa’e orasaun para bele hetan lalais kolega João Rosário nia isin lolon.
“Ha’u hanesan kolega ho João Rosario nia maluk traballadór iha Korea Súl sente triste tanba ami nia kolega lakon de’it iha mai nia le’et, maibé ami atu halo nusa, ita hotu reza de’it no ami husu ba familia sira iha Timor atu reza makaas no halo tuir adat iha munisípiu Bobonaru nian atu nune’e bele hetan lalais kolega ne’e nia isin lolon para depois bele lori ba Timor,” Esplika Pedrito.
Nia dehan, tuir Planu kuandu lahetan João Rosario nia isin lolon, sei lori de’it nia roupa ka foto hodi selebra funebre iha Timor tuir kultura, maibé ne’e depende ba família sira iha Timor ho adidu.
“Tuir informasaun ne’ebé ha’u asesu husi ami nia adidu katak loron 16 fulan abril traballadór Timór-oan barak mak sei fila ba Timor no karik aban mak lahetan nia isin lolon adidu sei rezolve oinsá ho família iha Timor atu lori de’it nia foto ida husi Korea ba Timor ka oinsá ne’e depende ba adidu ho família sira,”nia deklara.
Nune’e,Lafaeknews.com tenta konfirma ho adidu traballadór Timor Leste iha Korea Súl, maibé nia parte la atende tanba okupadu no preukupa loos ho traballadór Timor-óan ne’ebé lakon tanba adidu refere mak hanesan responsavél masimu ba traballadór Timor Leste Iha Korea Súl.
Jornalista : Egidio Nono
Editór : Floriano Soares
