Lafaek News–Kinta (04/11/2021), Media online Lafaek News asina nota entendimentu (MoU) ofisialmente ho Instituisaun Profisional kiniacademy Malaysia ho objetivu promove Timor-Leste ba nasaun sira iha sudueste azeátiku iha area Turismu, kombate korupsaun, hametin seguransa marítima no ambiente.
Kiniacademy hanesan instituisaun media profisional Malaysia nian ne’ebé halo nia kursu prátika iha area media ho parseiru sira hodi responde ba dezafiu global, ho nune’e projetu ne’ebé média lafaek news ho kiniacademy implementa ho naran Southeast Asia Forum For Reporting (SEAFORE) ne’ebé sei foka liu ba area Turizmu, kombate korupsaun, hametin siguransa marítima no ambiente.
Koordenadór ba projetu SEAFORE, Danny Yong hatete, objetivu involve Lafaek news ba projetu SEAFORE, razaun hakarak mós hatene prespetiva Timor-Leste nian kona-ba ASEAN area turismu, kompate korupsaun, hametin siguransa maritima no ambiente.
Intensaun seluk mak kiniacademy hakarak atu dezenvolve rekursu umanu iha media foun sira hanesan Lafaek news,” dehan Danny Yong Kordenadór ba projetu SEAFORE ba Lafaek new via WhatsApp, kinta (04/11/2021)
Projetu ne’e sei halo durante fulan rua hahu hosi Novembru too Dezembru, Iha projetu ne’e sei halo ho versaun rua mak hanesan hakerek artigu no video dokumentáriu ne’ebé sei publika iha nasaun sanolu resin ida (11) no kanal media hanesan Thmey Thmey Cambodia, Sea globe, new naratif, Frontier Myanmar, tempo Indonesia, Malaysia Kini, Oriental dalily no inkui www.lafaeknews.com.
Iha sorin seluk, xefe redasaun Lafaek News Acacio Pinto, hatoo agradese ho apresiasaun boot ba kiniacademy Malaysia, tanba bele fó konfiansa ba lafaek news atu hola parte ba projetu internasional ne’e, ho komitmentu sei nafatin servisu hamutuk ho kiniacademy hodi kanaliza Timor-Leste ba ASEAN.
Timor Leste dadaun ne’e esforsu an atu adere ba ASEAN tanba ne’e lafaek news konsidera ida ne’e oportunidade signifikativu hodi promove Timor-Leste ba ASEAN,” dehan Acacio
Jornalista : Felisberto Fernandes
Editor : Agapito de Deus
