Lafaek News--koordenador nain tolu kompostu husi partidu FRETILIN, Partidu Libertasaun Populasaun (PLP) ho Partidu Demokrátiku (PD), domingu (20/02/22) deside afilia ba ba partidu CNRT hodi apoiu Laureadu José Ramos Horta ba Prezidente Repúblika períodu 2022-2027 hodi hadia hikas imajen Timor iha mundu internasional nia oin.
Vise Koordenador partidu FRETILIN postu administrativu Atabe, Alberto Fontes iha nia deklarasaun afiliasaun katak, Timor atu garante ekonomia sustentabilidade ba inan-aman sira iha areas remotas so Ramos Horta ho Xanana Gusmão tenke kaer hikas fali ukun, José Ramos Horta tenke ba Prezidente Repúblika no Xanana Gusmão ba kaer órgaun ezekutivu (governu).
Ha’u labele ko’alia barak, agradese ba partidu CNRT ne’ebé bele simu ami nia afiliasaun husi estrutura FRETILIN postu administrativu Atabae, ha’u mai hanesan pesoal, maibe mai ho forsa politika atu apoiu Horta ba PR ho Xanana ba kaer governu hodi halo dezenvolvimentu ba rai ne’e,’’ vise koordenador partidu FRETILIN postu Atabae, Alberto Fontes iha suku Aidaba-Leten postu administrativu Atabe, munisípiu Bobonaru, Domingu (20/02/22).
Nia dehan, Horta de’it mak koñesidu iha mundu internsional, afiliantes FRETILIN ba CNRT lalika dúvida, Ramos Horta sei rezolve problema iha rai laran no sei lori investor husi rai liur mai loke kampu servisu iha Timor.
Ami prontu apoiu Horta ho Xanana ba ukun atu rezolve joven sira problema ho Timor nia problema inklui ha’u nia problema,’’ katak Alberto Fontes.
Afiliante vise koordenador FRETILIN ne’e. Husu estrututra partidu FRETILIN postu Atabae tempu ona fo votus ba Horta ho Xanana (XARA) atu hadia hikas imajen Timor iha mundu no re-normaliza fali ekonomia iha Timor Leste tua povu bele moris di’ak.
Ha’u husu estrutura FRETILIN postu Atabae mai ita hamutuk apoiu Xanana ho Horta lori Timor ba oin,’’ Alberto Fontes akresenta.
Iha fatin hanesan, koordenador Partidu Libertasaun popular (PLP) Carlos Verificacão, reafirma razaun afilia ba CNRT tanba hakarak Timor ne’e atu garante estabilidade governasaun hodi normaliza ekonomia ne’ebé tuun husi 2017 too ohin, presiza Horta ho Xanana mak ukun hikas hodi hadia mós imajen Timor iha mundu no hadia ekonomia rai laran.
Ha’u mai ho laran atu hamutuk ho maun Xanana lori Timor ba oin, se laos XANANA-Horta se tan, apresia mos Horta kandidatu ba PR, ha’u mai nudar individu mai ho forsa tomak apoiu ita boot ba prezidente repúblika, ha’u labele promete, maibé loron 19 mak ita haree rezultadu iha Atabae,’’ Carlos promete iha nia deklarasaun afiliasaun husi PLP ba CNRT hodi apoiu Horta ba PR periodu 2022-2027.
https://lafaeknews.tl/juventude-bairu-14-apoiu-horta-xanana-tenke-servisu-buka-apoiantes-vota-nu-14/
Iha sorin seluk, koordenador Partidu Demokrátiku (PD) postu Administrativu Atabae, munispiu Bobonaro Sergio Malibuti, reafirma durante tinan haat nia laran povu moris iha situasaun inserteza laran, povu halerik ba ekonomia no sira nia nesesidade moris loro-loron, se loos mak atu fo solusaun ba problema ne’e só Xanana Gusmão José Ramos Horta, ho razaun ne’e deside afilia ba partidu CNRT.
Ha’u deside fila ba CNRT, tanba haree haree ema ne’ebé matenek hodi dezenvolve nasaun ne’e hodi lori matak malirin ba povu Timor Leste, ha’u mai hanesan individu maibé ho militantes lubun hodi deside afilia ba CNRT hodi apoiu maun José Ramos Horta ba Prezidente Repúblika no maun Xanana ba lider governu hodi hadia rai ne’e ba oin,’’ nia afirma.
Entretantu, kandidatu Prezidente Repúblika periodu 2022-2027 ho númeru sorteiu 14, Laureadu José Ramos Horta, hateten nia apresia ho inisiativa koordenador partdu PLP, PD ho FRETILIN ne’ebé ho hanoin di’ak apoiu hamutuk ho CNRT hamutuk ho Xanana Gusmão ho José Ramos Horta.
Ita boot sira husi FRETILIN mai hamutuk CNRT apoiu hau ne’e apresiasaun boot, maibe hau mos fundador FRETILIN, maun Xanana mos fundador FRETILIN no reorganiza hikas funu ba oin ohin ita hetan Ukun Rasik An,’’ katak Horta.
Horta reafirma, tempu ona hadia nasaun Timor no hatuur hikas regras konstitusional iha nia fatin atu ema hotu respeita, órgaun sobernia haat bele halo servisu tuir dalan loos hodi garante unidade nasional, estabilidade governativa hadia ekonomia Timor Leste ba oin atu povu bele moris di’ak.
Partisipa iha eventu afiliasaun ne’e, eis Ministru Justisa Ivo Valente, deputadu bankada CNRT, estrutura nasionál no estrutura postu administrativu Atabae munispiu Bobonaro inklui militantes CNRT rasik inklui afiliantes militante partidu Fretilin, Partidu Libertasaun Populár (PLP) no Partidu Demokrátiku.
Observasaun lafaek news, nota iha serimonia afiliasaun ne’e dahuluk ho orasaun no tuir kedan ho iñu nasional patria-patria toka ho sound hodi militantes sira hananu tuir, balun ibun la book an, uituan de’it mak kanta tuir ho lian nei-neik too remata,no kontinua kedan ho iñu partidu CNRT nian tuir fali ajenda afiliasaun husi partidu tolu kompostu husi Fretilin, PD ho PLP.
Jornalista : Agapito de Deus
Editor : Floriano Soares
