Lafaek News–Prezidente Partidu Consellu Nasional Rekonstrusaun de Timor (CNRT), Kay Rala Xanana Gusmao, husu juventude Bairu Tasi-Tolu kompostu husi bairu 14 servisu maka’as buka apoiantes hodi vota ba kandidatu ho númeru sorteiru 14 iha loron 19 Marsu 2022, hodi lori José Ramos Horta ba palasiu prezidente Aitarak-Laran.
‘’Husu juventude Tasi Tolu servisu maka’as hatoo mensajen ba joven seluk atu hatene kandidatu José Ramos Horta ho númeru sorteiu 14, hatoo mensajen númeru 14 númeru domin nain ba povu no nasaun Timor Leste ,’’ afirma Kay Rala Xanana Gusmão ba juventude sira iha Tasi-Tolu, sábadu (19/02/2022).
Iha eventu polítika ne’e lider Karimátiku ne’e dehan, tempu ona atu hadia hikas sistema hotu ne’ebé durante ne’e mosu failansu boot ne’ebé la fó valor no benefisiu ba povu kiik sira ne’ebé luta ba nasaun ohin hetan liberdade ema hotu bele goja ema balun sakrifika an, tanba ne’e tempu ona atu ema hotu respeita konstituisaun .
Juventude bairu 14 iha Tasi-Tolu reafirma apoiu total ba kandidatu Prezidente Repúblika períodu 2022-2027, Jose Ramos Horta ho númeru sorteiru 14, ne’ebe hetan bensaun husi partidu CNRT no fo bensaun direta husi lider karimátiku Kay Rala Xanana Gusmão.
Jornalista : Azelio da Cruz
Editor : Agapito de Deus
