Lafaek News–Governu liu husi Konsellu Ministru (KM), ohin kuarta (07/07) aprova projetu rezolusaun governu nian ne’ebé mantein impozisaun Serka Sanitária (SS) Munisípiu Dili ba loron 7 tan no hapara SS iha Baukau.
Ministru Prezidénsia no Konsellu Ministru (MPKM) Fidelis Manuel Leite Magalhães hateten, hafoin halo análiza bá aprezentasaun husi pontu situasaun epidemiolójika nasionál husi Koordenadór sira Sala Situasaun Sentru Integradu Jestaun Krize (SIJK), konsellu misnistru delibera atu aprova projetu rezolusaun Governu nian ne’ebé mantein impozisaun serka sanitária (SS) iha munisipiu Dili bá loron 7 tan.
“Ita rona aprezentasaun kle’an husi SIJK, konsellu ministru atu la extende tan serka sanitária iha munisípiu Baucau, tanba númeru moras tun,” dehan Ministru Prezidénsia Konsellu Ministru, Fidélis Magalhães bá jornalista, hafoin remata enkontru Konsellu Ministru iha Palasio Governu Dili, Kuarta (07/07/21).
Governante ne’e akresenta, Konsellu Ministru mós deside extende tan impozisaun SS iha munisípiu Dili bá loron 7 tan, tanba dadus estratístika hatudu, númeru infesaun Covid-19 sei ejíste.
“Konsellu ministru mós deside katak, serka sanitária sei extende tan bá loron 7, hahú husi aban (kinta-feira) to’o kinta oin mai loron 15 fulan-Jullu nian, tanba númeru transmisaun iha Dili mós sei iha, maske estratístika hatudu, númeru ne’ebé konstante tun,” dehan MPKM Fidelis Magalhães.
Enkuantu nia dehan maske númeru kazu pozitivu bá Covid-19 iha munisípiu Dili hahú menus, maibé ne’e la sai motivu bá governu atu hakotu ona impozisaun SS, tanba seidauk lakon totál.Tanba ne’e, ezekutivu ho ekipa saúde sei halo esforsu liután ho kuidadu ho kombate vírus Covid-19, tanba dadauk ne’e, variante foun Delta husi SARS-CoV-2 hahú ona iha nasaun viziñu Austrália ho Indonézia.
“Semana oin mak konsellu ministru sei halo fali tan avaliasaun kona-ba desizaun relasiona ho impozisaun serka sanitária ne’e,” informa Fidélis.
Ne’eduni ho extensaun SS iha munisípiu Dili ne’e, bandu nafatin sirkulasaun sidadaun sira nian entre munisípiu Dili ho munisípiu sira seluk.Maibé, exetu iha situasaun emerjénsia sira hanesan, razaun seguransa públika, saúde públika, asisténsia umanitária, manutensaun abastesimentu públiku ne’ebé importante tebes bá interese públiku.
Entretantu proibisaun sirkulasaun ne’e abranje ba ema ne’ebé komprova ona vasinasaun kompleta ona doze dalarua kontra Covid-19, inklui bá labarik sira tinan neen mai kraik ne’ebé akompañia.
Jornalista : Juvita dos Santos
Editor : Agapito de Deus
