Lafaek News–Konsellu Imprensa servisu hamutuk ho Sekretaraiadu Tékniku Administrasaun Eleitoral (STAE) finaliza ona produsaun kartaun kredensial vota movél nian distribui ona ba jornalista sira hodi bele livremente vota iha fatin ne’ebé kobertura ba.
Liuhosi kooperasaun ne’e, KI espesifikamente haknar-an, verifika dadus ba jornalista sira hosi media nasional hotu hodi fasilita aplikasaun ba karta kredénsial vota movel iha STAE.
Prosesu verifikasaun hodi aplika ba karta kredensial vota movel iha kriteria tolu, jornalista tenke iha kartaun profisional ka kartaun estajiu profisional, jornalista tenke mai hosi media profisional no verifika rekezitu sira ne’ebé STAE fó hanesan iha ne’ebé indika, jornalista tenke iha kartaun vasina, priense formulariu no priense deklarasaun komprimisu.
“Dia 19, iha tempu kampañia UNDP no Embaixada Japaun liuhosi konsellu imprensa apoiu, hili jornalista 20 hosi media hotu-hotu hodi hala’o média tour iha fatin tolu mak hanesan parte leste, raiklaran no rai ikun ho objetivu atu halo kobertura hodi garante balansu iha prosesu eleisaun nian,” dehan Diretor Ezekutivu Konsellu Imprensa Rigoberto Monteiro iha edifisiu KI Kintal Boot, sesta (11/03/22).
Iha fatin hanesan Prezidente interinu konsellu imprensa Expedito Loro Dias Ximene hatene, hahu hosi loron ohin ba to’o loron 19 jornalista sira nia konsetrasaun mak oinsa bele fó kobertura ida ne’ebé di’ak mak tenke Garante kualidade protudu jornalistiku katak iha prosesu kobertura tenke tuir kodiku jornalismu no halo kobertura ida ne’ebé bele fó ba públiku informasaun ne’ebé saúdavel.
Nia intensifika, iha mundu jornalismu iha buat ida ne’ebé importante liu mak, maske jornalista bele kobertura iha ne’ebé de’it, ho sé de’it, maibé tenke iha responsabilidade bo’ot ba nasaun no ba povu, no responsabilidede ne’e mai hosi obedese kode étika jornalizmu.
Iha prosesu kampaña eleitoral no prosesu votasaun iha loron 19 fulan Marsu KI servisu hamutuk ho UNDP elabara matadalan reportajen ba eleisaun prezidensial so sei distribui ba jornalista sira iha loron 14 segunda ne’e.
Hosi mata-dalan ne’e jornalista sira mós bele promove Paz jornalismu katak karik kadidatu baluk uza liufuan ne’ebé bele hamosu konflitu, jornalista, nudar mós meiu komunikasaun ida bele filtra informasaun negativu ne’e hodi nafatin promove paz iha informasaun hotu.
Kartaun kedensial vota movel katak jornalista sira ne’ebé hetan kartaun ne’e bele vota iha fatin ne’ebé de’it maibé tuir komprimisu katak jornalita labele vota dalarua no iha kode etika jornalismu pontu sanolu mós mensiona katak sinseriu no onestu iha kobertura no onestu ida mak labele vota dalarua,” dehan Expedito
Iha kartaun kredensial ne’e iha signifikadu ne’ebé bo’ot no la’os ema naran naran simu kartaun ida ne’e maibé so jornalista mak simu ida ne’e tanba jornalista halo servisu ida ne’ebé bo’ot hodi fornese informasaun los no kredivél ba publiku.
Nia Sujere mos ba jornalista hotu katak bainhira iha terenu mak hasoru ketaun ruma bele komunika mai KI ka bele direta ba CNE no STAE ne’ebé iha terenu.
Jornalista : Felisberto Fernandes
Editor : Agapito de Deus
