Lafaek News–Ministru Prezidénsia no Konsellu Ministru (MPKM), Fidelis Manuel Leite Magalhães informa, governu promove aban sesta (28/01/2022), husi dadeer tuku 8: 00 too tuku 5:00 OTL funsionárius tomak sei iha asaun limpeza jerál iha nivél nasionál hodi prevene kazu dengue.
Apela ba sidadaun sira hotu, autoridade sira hotu iha nivél nasionál atu hamutuk halo limpeza jerál iha fatin públiku nomós iha sidadaun sira ida-idak nia uma, ida ne’e laos de’it ba orgaun sira governu nian maibé mós husu ba sosiedade sivil sira hotu,” dehan MPKM Fidelis Magalhães husi nia konferénsia imprensa iha Palasio Governu Dili, kinta (27/01/2022).
Governante ne’e akresenta, kampañia limpeza ida ne’e hanesan parte ida husi kombate surtu dengue ne’ebé Timor-Leste oras ne’e sofre hela, nune’e kazu ne’ebé rejistu to’o agora hamutuk 972 no husi informasaun ne’ebé hetan husi Ministériu Saúde katak mate hamutuk nain 18.
Tuir dadus ne’ebé mak hetan, munisipiu Dili mak afetadu liu ho totál kazu hamutuk 648, tan ne’e orientasaun ida ne’e fó sai ba aban (28/01/2022) sei hala’o loron tomak.
Semana hirak tuir mai ne’e hafoin reuniaun Konsellu Ministrus kuarta agora mak ami sei komunika fali desizaun ida ne’e ba ita boot sira, atu halo semana semana ka atu halo semana ida dala hira,” informa MPKM Fidelis Magalhães.
Enkuantu Ministériu Administrasaun Estatál mak sei fó sai orgaun no servisu administrasaun públika sira kona- ba organizasaun no distribuisaun ekipa sira ba limpeza jerál ne’e.
Jornalista : Juvita dos Santos
Editor : Agapito de Deus
