Lafaek News–Akademista Universidade Nasional Timor Loro sa’e (UNTL) Departamentu Dezenvolvimentu Komunitáriu, Julio Aparicio hateten karta sekretariu jerál partidu FRETILIN, Marí Alkatiri, intensaun di’ak ba Timor atu ba oin, maibé la pás ho situasaun.
Julio hateten, maneira husi lider partidu FRETILIN nian haruk karta ba lider nasional sira hanesan, Kay Rala Xanana Gusmão ho Premiadu Nobel da Paz atual prezidente repúblika eleitu José Ramos Horta atu diálogu hamutuk haree ba oin lori Timor sai furak liután.
Karta ne’e tarde liu no la pas ho situasaun, dala ruma intensaun husi lider FRETILIN sira di’ak, maibé la apar ho situasaun,’’katak Julio Aparicio ba Lafaek News iha nia kna’ar fatin UNTL Kaikoli, kinta (21/04/2022).
Julio hateten, nia razaun karta refere la kondis ho situasaun enkuantu haruka ba Xanana Gusmão ho José Ramos Horta, tanba devia haruka antes ba kampania, maibé kampania hotu ona foin hakfodak haruka karta ba lider nasionál jerasaun tuan atu hamutuk hateke ba oin, intensionalmente di’ak, maibé ema bele halo interpretasaun oin seluk.https://lafaeknews.tl/horta-prontu-simu-lakon-ho-manan-sei-servisu-hamutuk-ho-fretilin/
Ba ha’u haree lideransa istóriku ho ita nia fundador sira iha buat di’ak barak mak sira halo no iha mos sala barak ne’ebé sira halo, ha’u nudar jerasaun foun lakohi fo sala ba sira, maibé sai lisaun ba jerasaun foun sira hotu, hanesan maun Xanana Gusmão dehan sira ne’e mesak doutor ho jeneral de’it, ida ne’e hatudu katak Xanana la satisfas ho sira nia lia-fuan no arogansia durante hala’o iha kampaña, entaun maske ita iha intensaun di’ak, maibé ema labele simu ita nia intensaun ne’e, tanba ita nia maneira hatoo buat ruma ne’e la atrai entaun ita nia hakarak di’ak ne’e failla, ’’dehan akademista UNTL ne’e.
Maibé, Julio dehan, intensionalmente karta ne’ebé sekretariu jeral partidu FRETILIN Marí Alkatiri hatoo ba lider sira seluk ne’e di’ak, maske tempu mak la hanesan, maibé kompeténsia tomak ba prezidente repúblika eleitu atu halibur lider nasional hotu hamutuk ko’alia oinsá projeta estadu no nasaun Timor Leste ba oin.
Ha’u fiar katak prezidente eleitu bele konvida lider nasional sira tuur hamutuk ko’alia oinsá bele lori rai ne’e ba oin,’’katak Julio Aparicio.
Hodi dehan, maibé lideransa hotu-hotu tenke hadia an atu bele hetan nafatin konfiansa husi povu, tanba povu atu moris di’ak la’os lia-fuan mamuk de’it, presiza planu ida konkreta hodi hatudu responde ba ezijénsia no halerik povu kiik nian iha baze.
Povu atu moria di’ak ne’e la’os ho lia-fuan mamuk no la’os iha konseitu hamutuk de’it, maibé tenke asaun konkreta hodi hatan kedan ba ezijénsia povu nia atu lori nasaun ne’e ba di’ak, presiza ita hotu hametin unidade paz no estabilidade, ko’alia rona malu hodi hasees povu husi kiak ho mukit,’’Julio akresenta.
Jornalista : Agapito de Deus
Editor : Floriano Soares
