Lafaek News–Reprezentante Juventude aldeia Kulau suku Ailok postu administrativu Kristu-Rei, Luciana Pereira husu kandidatu Prezidente Republika periodu 2022-2027, José Ramos Horta bainhira asume Xefe Estadu ko’alia ho governu kria kampu servisu iha rai-laran hodi evita problema entre juventude Timor Leste.
Reprezentante juventude feto aldeia Kulau hatoo kestaun ne’e iha diálogu entre komunidade Kulai ho kandidatu Prezidente Repúblika periodu 2022-2027, ho númeru sorteiu 14, Laureadu Nobel ba Paz José Ramos Horta, no husu Prezidente Repúblika 2022-2027 atu ko’alia ho governu loke kampu servisu ba foin sa’e sira hodi diminui krime iha sosiedade nia leet. https://lafaeknews.tl/Kontaktu-Japaun-Alemana-Simu-Traballador-Timor-oan-Xanana-Horta-reprezenta-ilas-nai-Jesus-Kristu/
Ami juventude husi aldeia Kulau hakarak hatoo ha’u nia sujestaun ba kandidatu Prezidente Repúblika José Ramos Horta karik sai xefe estadu kria kampu servisu ba juventude sira iha Timor laran hodi evita konfrontasaun iha sosiedade nia leet,’’ dehan reprezentante Juventude aldeia Kulau suku Ailok, Kinta (24/02/22).
Luciana fundamenta, loke kampu servisu la signifika joven hotu tenke ba servisu iha kantor, maibé ko’alia ho governu oinsá bele kria servisu sira iha baze atu involve joven sira iha sosiedade atu evita joven sira halo krime.
Hatan ba preukupasaun ne’e, kandidatu Prezidente Repúblika Premiadu Nobel ba Paz, José Ramos Horta hatan, nia sei ko’alia ho governu sobre kestaun postu servisu, maibé labele servisu de’it iha funsaun publika nian, se bele governu kria programa ida hodi hadia uma hirak iha sidade Dili laran, liu-liu uma hirak ne’ebé rabat malu no uma balun kondisaun at ona iha bairu-bairu iha Dili laran.
Ha’u rona joven ko’alia atu kria postu traballu, maibé vaga servisu ne’e labele iha funsaun publika, presiza tenke iha reforma no ema barak liu gasta osan de’it, la halo servisu la hatene, ha’u haree uma iha bairu-bairu rungu-ranga uma sena malu, balun halo tan dalan laran, entaun governu bele haree halo programa espesial, oinsá buka hadia uma sira barak-barak, balun tenke fokit sai ba fatin seluk, mas balun buka hadia, see mak atu hadia, ita haree joven kapirnteiru sira mak bele hadia,’’ resposta kandidatu PR José Ramos Horta ba reprezentante juventude aldeia Kulau iha sesaun husu no hatan ne’e iha aldeia Kulau suku Ailok, kinta (24/02/22).
Premiadu Nobel ba Paz ne’e fundamenta tan, se bele governu fo kompensasaun ba komunidade, muda husi fatin ne’e ba fatin seluk, la presiza halo planu urbanizasaun tanba sei lori tempu naruk, atu nune’e mobiliza joven sira servisu hamutuk SEFOPE simu treinamentu kria programa ida hadia uma kada bairu nune’e bele fo servisu ba joven barak.
Nia katak, seluk fali mobiliza joven sira hadia estrada kada sukus iha territoriu tuir orientasaun tékniku sira, maibe la presiza dada kompania sira husi rai liur, bele kontinua haree programa joven sira ba servisu iha rai liur, ne’e la’os mo’e.
Ha’u komesa ho Alemania, la’os atan ba ema ida, maibé ita servisu mak sira seluk, vida iha alemanha, mas servisu manan osan boot, tanba sira ba liur ne’e laos buka de’it osan maibe sira aprende, depois sira fila ho kakutak oin seluk, tan ne’e programa hirak ne’e governu bele book an
Horta dehan, klaru kria kampu servisu iha rai-laran, governu fornese material organiza joven sira mak halo, signifika fo servisu ba joven sira.
Uluk ha’u sei prezidente ha’u halo ida ne’e, halo iha Dili no halo iha Kribas, DIli, iha Taibesi, Bekora Raikotu too Atauro, joven sira mak halo no koordena husi xefe aldeia, ba ha’u prioridade bee mos ba aldeia no nutrisaun ba labarik no inan-aman,’’ katak kandidatu PR númeru sorteiru 14 ne’e.
Labele iha Timor labarik sira extrema sub-nutrisaun, tenke loke programa kada aldeia suku ho infermeiru ho doutor atu vizita uma kain hotu atu hanorin inan sira kona-ba nutrisaun, ‘’ha’u simu todan nu’udar PR sei halo servisu hamutuk ho governu hadia kiik oan ho inan sira nia saúde,’’ Horta promete.
Ita hotu moris tanba inan ida, se laiha inan ida imposivel, animal mos iha inan ida, liu-liu aman ho oan feto sira tau matan ba inan, tanba inan mak sofre tebes bainhira labarik atu moris no fo susun ben ba labarik, inan mak fase labarik la’os aman, portantu prioridade ba ha’u hadia inan ho kiik oan sira nia saúde,’’ Horta hakotu.
entretantu, atividade kandidatu Prezidente Repúblika José Ramos iha loron kinta (24/02/22), ajenda diálogu dahuluk ho komunidade aldeia Kulau suku Ailok postu administrativu Kristu-Rei, no sesaun diálogu iha fatin ne’e remata kontinua kedan diálogu daruak iha aldeia Bidau Toko Baru suku Bidau too remata, no iha diálogu ba sesaun husu no hatan nian joven sira husu liu kona-ba kampu servisu no hakotu impase polítika iha rai laran.
Jornalista : Agapito de Deus
Editor : Floriano Soares
