Lautém-(Lafaek News)—Juventude hosi suku tolu kompostu hosi suku Serelau, Mahina II no suku Baduro, postu Lautém, munisípiu Lautém hala’o jogu amizade hodi hametin pás entre juventude sira.
“Atividade ne’e ami realiza atu bele selebra loron bo’ot natal, no parte ida atu bele kria lasu amizade entre joven sira tanba besik ona tinan foun ita tenke kuda mós buat foun atu bele sai mata dalan iha futuru,” reprezentante juventude Rogerio de Jesus Lopes ba Lafaek News foin lalais ne’e iha Laikara, munisípiu Lautem.
Nia hatutan, jogu ohin ne’e bele realiza tanba hetan suporta hosi entidade seguransa no komunidade inklui veteranu sira.
Argumenta nia, jogu ne’e hetan partisipasaun másimu hosi juventude suku tolu ne’e nian liuliu sira ne’ebé mak iha talentu kona-ba futébol.
Afirma nia, tanba liuhosi meius sira hanesan ne’e, bele redús konflito entre joven sira, atu nune’e kontribui pás durante loron bo’ot no bele kontinua metin nafatin hodi konsidera malu hanesan feton nan nian de’it.
Entretantu klúbe ne’ebé registu atu kompete iha jogu refere hamutuk Sanulu Resin Rua, no tuir oráriu jogu refere sei termina fulan ne’e nia laran.
Jornalista: Anselmo Monteiro
Editór : Ezequias Tomás
