Tersa, 29/03/2022.
Husi: Domingos Maia.
“Heran kai!” Maun-boot sira mós agora halo ahi-moris, ida la kohi lakon!
Maibé, fukun- naksalak mak ida nebé loos? Ez: Ema ida hetan tiha Moras-krónika malária dengue, maibé deklara uluk tiha ba doutór, katak nia kona moras-aat Covid-19.
See mak sei hetan nia desvantajen?
“Heran kai!” Maun-boot sira mós, iha biban Quaresma, nu’udar atan ki’ak no maksalak, halo mós esforsu atu hadera-an, so’e tiha hahalok-aat sira hotu hodi hakfilak ho neon no laran tomak ba Maromak hodi temi netik naran ,”Jesus, Messias”, sei soi perdaun.
“Heran kai …!” Maun-boot sira mós hakarak sai modelu-aman fiar-na’in, hanaran-an hanesan Jesus, Messias, Na’i Maksoin. Ksolok ba sira!
Maun-boot sira,
se hala’o polítika ho neon-moos tuir padraun étika-morál mak sira mós hala’o hela kna’ar sarani nian hodi santifika-an no sai lalenok santifikasaun ba Povu Timorense tomak.
Ideál katak ema hotu tenke buka sai santu hanesan Aman Lalehan Santu, (Jo 11: 25; 1Kór 11: 1).
Tan ne’e, liuhousi Jesus, Messias Mane Maksoi nebé mak sai dalan-loos, lia-loos no modelu-moris loos (Jo 14, 6) tenke hakat-tuir banati Jesus iha moris lorloron. Ne’e sala kah?
Nune’e mak bainhira temi naran “Jesus” no “Messias”, ita simu no konfesa katak Na’i Jesus nu’udar Juiz-Ulun ba fiar-na’in idak-idak nian konsiénsia-maksalak.
“Heran kai, belun sira! Sala saida bainhira maun-boot sira ne’e identifika-an “hanesan Jesus no Messias?”
Be la’ós ida ne’e mak sai ideál ba sarani sira hotu tenke pratika duni hodi sai santu hanesan Aman Lalehan Santu? Kasian, kal doutrina mak la klean!
Nia sentidu: “Jesus” katak Ema ida nebé hetan tula-liman (o ungido) housi Aman Maromak hodi soi kbi’it-tomak lalehan no rai nian; no “Messias” mak títulu Maksoi mak Jesus mesan (Único); la iha tan seluk ida.
Be sai sarani, simu Jesus nú Messias liuhousi Sakramentu Batismu, la’ós atu sai Nia sa’e-seluk no maksasin ba maluk mundu tomak kah? Sá mak sala?
Oh, ida nebé sala mak bainhira ha’u :
— deklara-an ba públiku katak sira mak sai fali nú/nu’udar Jesus no sira mak Messias. Ne’e mak sai profeta no norin falsu.
— ema individu grupu-seluk interpreta ho tendénsia polítika manipulativu kona-bá maun-boot sira-nia deklarasaun apoiu morál polítika ba fali interese individu ka grupu nian.
— karik maun-boot sira mak ho hakaran duni uza naran “Jesus” no títular “Messias” hanesan polítika kamoflaze ida hodi falun- metin de’it sira-nia kanek, falta ka salan sira.
Ema neon-na’in tenke fihir no tahek didi’ak hanoin sira (discernir bem os pensamentos).
Mai ita aprende ho lia-murak ida ne’e: “Dalamnya laut, bisa diduga; dalamnya hati, siapa yang tahu”.
Tenke leno buat hotu ho neon- moos atu keta julga narn-aran ema seluk; no fihir buat hotu ho kakutak-
krítiku atu la bele monu lerek ba babeur satanás nian, ohin loron.
Se moras, prezenta-an, esplika sintomas, doutór de’it mak determina moras saida; dún-sala ema-seluk, dún-loos an rasik.
Lialoos mak sai abrigu-metin ba luta-na’in sira hotu.
A luta continua!
