Lafaek News— Emprezáriu Timo-roan Vicente Maubisse lori investór husi nasaun Srilánka aprejenta ba Prezidente Repúblika José Ramos Horta ho objetivu atu investe fábrika simente no besi iha nasaun Timor Leste, iha ne’ebé fatin identifika ona iha munisípiu Baukau no Lautém.
“Ha’u lori sira investedór husi Srilanka mai hasoru malu ho Prezidente Repúblika, asuntu ne’e keleur ona, kuaze tinan sanulu liu ona, oinsá mak buka investór real, tanba investór barak mai ko’alia de’it la halo buat ida. Investór mai halo investe iha fabrika semente no fabrika Besi, tanba Timor Leste ne’e iha faze konstrusaun ita presiza Besi no simente,” deklara Emprezáriu Timoroan Vicente Maubisse ba jornalista sira hafoin remata enkontru ho Prezidente Repúblika José Ramos-Horta iha Palasiu Prezidensiál Bairu-Pite, Tersa ( 28/02/2023).
Vicente Maubussi, hateten Timor ne’e rai investór barak, ho komponente bo’ot rua ne’ebé fábrika simente bele haruka ba Austrália no nasaun seluk tan.
“Fatin ne’ebé mak sai tarjetu hodi fábrika simente ne’e, iha munisípiu rua ne’ebé iha Munisípiu Baucku parte Kaisidu uluk Koreanu sira halo tiha ona ne’e, fatin ida mak iha Lospalos parte Laivai nian,” Maubussi afirma.
Nia dehan, investor husi Srilánka ne’e halo ona survei iha tinan kotuk, iha Lospalos nian fatuk mutin mahar liu Baucau nian, maibé teste laborátorium mak sei determina, sei halo hela estudu viabilidade, dala ruma fulan tolu ka haat mai tan investe ona iha tinan ida ne’e nia laran.
“Orsamentu atu investe ba iha fábrika simente ne’e hamutuk millaun 50, orsamentu ne’e husi na’in ba investór ne’e rasik,” katak reprezentante ba emprezáriu husi nasaun Srilánka ne’e.
Tuir nia, emprezáriu ne’e garante fábrika simente ne’e kualidade, tanba simente ne’e internasionalmente sei fahe ba nasaun sira seluk, hakarak manán ne’e tenke iha kualidade laiha se kualidade la manán buat ida.
Entretantu, iha enkontru ne’e Prezidente Repúblika José Ramos Horta fó welcome, hakarak investe lalais, enkoraja atu servisu di’ak, merkadu bo’ot, tanba Timor Leste mos atu tama ona ba ASEAN.
Jornalista : Rita Moniz
Editór : Agapito de Deus
