Kovalima (Lafaek News)— Xefe Suku Taroman postu administrativu Fatululik, munisípiu Kovalima, Leonel Assa, konsidera informasaun iha públiku katak sidadaun na’in-2 afetadu covid-19 tama illegal husi Indonézia ba Fatululik ne’e la loos.
“ Ha’u hanesan Autoridade local iha suku Taroman, iha informasaun katak iha ami nia postu ne’e ami nia komunidade sira subar ema ne’ebé tama mai husi Indonézia, maibé durante situasaun Covid 19 ami nunka subar ema ruma ne’ebé mai husi sorin, ne’ebe informasaun ne’e sei la lo’os, ne bosok,” Xefe Suku Taroman, Leonel Assa, ba Lafaek News iha Aldeia Fatuloro, Segunda semana ne’e.
Tanba ne’e Xefe Suku Leonel husu ba públiku sira, labele hafoer Posto Fatululik nia naran, maske Posto Fatululik pertense iha Liña Fronteira, maibé Komunidade sira iha postu refere mós assegura sira nia an husi Covid-19 nune’e moras labele tama mai nasaun Timor Leste.
“ Nu’udar Autoridade lokál iha suku Taroman Postu Fatululik, husu ba sidadaun hotu iha Timor laran ne’ebé asesu media social, atu la bele Pániku ho informasaun ne’ebé la loos, no la bele hafoer postu Fatululik nia naran,” Leonel rekomenda.
Tuir nia iha postu fatululik mos halo rasik siguransa ba sira nia aan hodi salva pandemia covid-19.
“Ami autoridade lokál hamutuk ho ami nia komunidade sira iha ne’e, ami mos seguransa ba ami nia an, atu nune’e ema husi indoneisa labele tama ilegal mai iha ami nia posto ida ne’e,” xefe suku Taroman ne’e argumenta.
Lider komunitáriu ne’e mós relata durante ne’e autoridade lokál servisu hamutuk ho seguransa sira hanesan Polísia UPF no F-FDTL destakadu iha fronteira posto Fatululik hodi assegura liña fronteira atu moras Covid 19 labele tama mai Nasaun Timor Leste.
“Bainhira ema ruma hakat husi Liña Fronteira, sira nia parte sei kontaktu ba ekipa saúde sira atu nune’e bele hatama sidadaun refere ba iha karantina,” Leonel akresenta.
Jornalísta : Tynho Gusmão (RCCT)
Editor : Chamot Nahac
