Lafaek News—Estudante Universidade da Paz (UNPAZ) lansa asaun pasífika hasoru Parlamentu Nasionál, ho razaun konsidera independénsia iha Timor-Leste la fó valór ba povu nia moris, independénsia ne’e habosu de’it makaer-ukun sira kabun.
Senadu ne’e haktuir, reprezenta Universidade da Paz, presiza hatudu uluk papél estudante nian hanesan tránsformador no kontrolu sosial, hodi halo intervensaun ba kualker situasaun ne’ebé la fó valór ba nesesidade povu nian.
“Ami nia deverno responsabilidade moral atu halo intervensaun ba kualker situasaun ne’ebé la faforese ba nesesidade povu nian, tanba ne’e ami estudante nia ezisténsia ho instituisaun ninian nu’udar sosiedade ninian, hodi transforma sosiedade liuhusi lahatene ba hatene, tanba ne’e ami koopera ho Universidade hodi hare’e ba dezisaun públiku tomak ne’ebé la fó valór ba nesesidade povu nian, ho Ida ne’e mak ami estudante Universidade da Paz (UNPAZ) hakarak halo ami nia responsabilidade moral nu’udar akadémiku iha estadu no nasaun Ida ne’e atu halo intervensaun ba dezisaun saida de’it,”enadu Eleitu UNPAZ ba Jornalista Lafaek News iha resintu UNTL Liceu nia oin hafoin halo asaun pasífika hasoru Parlamentu Nasionál, kuarta, (16/11/2022)
Senadu Eleitu ne’e reafirma, Asaun pasífika halo tanba hare’e iha nasaun Timor-Leste nia independénsia ne’ebé laiha sentidu ba povu,tanba objetivu independénsia maka ema hotu atu livre iha aspetu oioin, inklui mós seguransa sira, maibé independénsia ne’ebé mak akontese nafatin hanesan ne’e nafatin, sei organiza nafatin maluk estudante sira husi UNPAZ inklui Universidade sira seluk hodi partisipa masimu hamutuk ho movimentu sira seluk hanesan Aliansa Maubere Nasionàl (AMN) no Movimentu Resisténsia Sosial (MRS) hodi kontinua halo asaun pasífika ne’e hasoru injustisa sosial no deskriminasaun iha Rai Ida ne’e.
“Ami husi Universidade da Paz mai iha ne’e, Reitor UNPAZ fó apoiu totalmente ba estudante sira hodi hala’o papél estudante nian nu’udar tránsformador ba sosiedade, tanba ne’e mak horseik 15/11,Ami hamutuk ho Reitor tun diretamente iha asaun pasífika hasoru Parlamentu Nasionál, ohin prezensa Reitor nian laiha tanba okupadu ho atividade seluk, maibé Reitor nia apoiu totalmente mai ami estudante sira hodi kontra injustisa ne’ebé halo terus liu-ona povu kiik sira, tanba ne’e iha asaun pasífika ne’e mantein too fulan rua tuir karta ne’ebé diriji ona ba parte seguransa”, tenik Efren
Nia hatutan, liafuan Demokrasia ne’ebé fahe ba parte rua, mak hanesan demo katak Povu no Krasia katak ukun, tanba ne’e tuir loloos dezisaun hotu no programa sira tomak tenki pro ba povu, maibé realidade ohin loron deputadus sira foti dezisaun la-rona ba organizasaun no intelektual sira nia opiniaun, husi Ida ne’e prespetiva estudantes provas katak demokrasia ne’e lakon no demokrasia ne’e ba ema oitoan de’it ne’ebé kaer ukun no podér nomos sira ne’ebé iha kapasidade ekonómia polítika hodi domina aspetu hotu-hotu.
“Iha pontu tolu (3) ne’ebé mak ami ho movimentu sira nomos estudante Universitariu sira hakarak halakon mak hanesan, lei pensaun vitalisia, sosa Prado sport kada periodiu ba deputadu/a sira nomos laptop, tanba ne’e Ami sei la para ho asaun pasífika Ida ne’e hodi hakilar defende lia-loos, tanba buat sira ne’e sai ona kultura ka toman Ida ba deputadu/a sira, tuir loloos kada periodu sira tenki fó ba malu hodi halo fiskalizasaun kaer buat ruma failla halo manutensaun laos kada periodu Sosa tan”, Nia hakotu
Iha observasaun Lafaek News.tl nota iha terenu, manisfestante sira ne’ebé partisipa iha asaun pasífika ne’e akumula husi Movimentu Aliansa Maubere Nasionàl (AMN), Movimentu Resisténsia Sosial (MRS) no estudante Universitariu sira husi UNTL,UNPAZ,UNDIL no UNITAL nomos Estudante Diretus Umanus
Jornalista : Felipe Soares
Editor : Agapito de Deus
