Haloos tiha Fiar-Kleuk (16/02/2022).
Hosi : Domingos Maia
Iha kah aktu-kultu kulturál tau-matan ba Oan-Ki’ak no Faluk sira? Buka tok ba!
Maluk sira:
Karik hatuur tiha ona kultu hana’i ba oan-ki’ak no faluk sira iha lisan sira Lia-moris no Lia-mate nian iha suku-étniku balun iha it’nia rain, deskreve tiha ba atu ema-sarani sira tanesan.
Iha rai-karan ne’e, iha prinsípiu kulturál ida mak temi “Muit Gout”, iha dalen-inan Mambae katak tane netik. Maibé kona-bá sentidu jerál, ema ka klibur ema sira nebé la iha riku-soin balada ka materia ida atu kumpri ezijénsia kultu ka serimónia kulturál lia-moris no lia-mate nian.
Haree ba nia motivu, objetivu no destinatáriu ba leten, lulik sira (uma-lulik, sasaan-lulik, matebian, nst); nia orientasaun no alvu la’ós ba ema. Nune’e, see mak buka meiu soi fodik ema ki’ak sira nia oin atu hatan ba ezijénsia kultu lisan, nia mak soi naran-boot no fama hodi tebe-rai makaas; no dala wa’in, haki’ak tiha tradisaun dependénsia-boot ida no atitude-nakraik ba ki’ak sira housi derasaan ba derasaan no otas ba otas la nahas.
Afinál tuir doutrina sarani nian iha Bíblia, Maromak nia hakaran no Jesus Kristu nia preferénsia oinseluk lós: Katak Relijiaun ida nebé moos no kmok hodi hatuur rituál kultu ida nebé loos mak tau-matan no hamaluk oan-ki’ak no faluk sira iha sira-nia moris terus susar no mukit lorloron no atu la bele kontamina ho buat babeur mundu nia, Tg 1: 27.
Tan ne’e, presiza atu hari’i fiar-loos housi Relijiaun ida nebé hanourin duni doutrina-loos; atu nunee, bele hatuur rituál-kultu ida loos ba Maromak Loloos Ida de’it; Ida nebé sukat mak ema fuan; la’ós matéria bainhira asisti liturjia ka kultu ruma. Amin.
