Lafaek News (Gleno)-Kandidatu Prezidente Repúblika 2022-2027, Premiadu Nobel da Paz, José Manuel Ramos Horta, promete bainhira eleitu duni ba Prezidente Repúblika iha loron 19 Abril sei buka ko’alia ho lider partidu Fretilin hodi servisu hamutuk.
Horta dehan iha primeira ronda nia kandidatura husi partidu CNRT, maibé iha segundu ronde partidu lubuk ida ho movimentus oi-oin, no kandidatus ne’ebé la liu iha ronde dahuluk hamutuk 14 mak apoiu tomak ba nia (JRH) nu’udar kandidatura nasionál, hahú husi Xanana too Timor Leste tomak hanesan movimentu boot ida hamutuk hakarak mudansa.
Agradese imi nia konfiansa, la’os atu halo buat hotu-hotu, ha’u eleitu karik iha dia 19 Abril, sei hahú servisu kedan ho maun boot Xanana ho partidu sira seluk ne’ebé apoiu hau, maibé servisu hamutuk ho FRETILIN, tanba partidu ne’ebé di’ak, tanba iha deputada iha parlamentu, ha’u sei ko’alia ho partidu iha parlamentu, sei ko’alia mos ho partidu ne’ebé laiha parlamentu, sei ko’alia ho ita nia igreja, ita nia intelektual sira atu harmoniza hakmatek no haklean dame iha nasaun ida ne’e,’’ Horta afirma iha mini-kampania iha Gleno munisípiu Ermera, kuarta (13/04/22).
Horta dehan, nasaun presiza estabilidade atu povu moris hakmatek, kosok oan sira ba eskola ho seguru, no sei defende konstituisaun RDTL ne’ebé hetan violasaun husi prezidente repúblika rasik kuaze dala hat tutuir malu, tuir mai impaktu iha parlamentu laran no iha funsionamentu governu, bainhira prezidente la fo pose ba membru governu CNRT nain 7 kedan inklui KHUNTO nain 2 hodi halo governu nakdoko, governu la konsege implementa orsamentu ho programa.
Buat sira ne’e hotu tenke haree, maibé haree mos ba oin tinan lima mai ne’e, buka dame iha rai-laran no buka dame mos iha rai liur, horiseik ha’u dadan husi tasi tolu ba halo gravasaun ida haruk ba Nova Iorke depois sira halo konferénsia boot ida iha ne’ebá, iha video ne’e ha’u ko’alia ita nia eleisaun nomos situasaun mundial, sira kontente ho mensajen ne’eb ha’u haruka ba, horiseik ha’u halo kedas zoom rua,’’ reafirma Horta iha Gleno.
Ne’eduni, Horta hateten ba povu tomak katak, karik eleitu duni iha loron 19 fulan Abril ida ne’e, sei la provoka krize ba rai ida ne’e, petisionáriu sira hatene momentu ne’eb krize 2006, Ramos Horta de’it mak vizita petisionáriu sira buka halo diálogu, no Horta mak hamutuk ho Xanana Gusmão buka solusaun ba problema petisionáriu sira.
Ha’u husu ba povu tomak ha’u eleitu sei la provoka krize ba rai ida ne’e, no nunka atu provoka krize,’’ katak Horta ba apoiantes sira iha mini-kampaña iha Gleno.
Observasaun Lafaek News nota, ajenda kandidatu númeru sorteiu 1 iha munisípiu Ermera lolos diálogu, maibé haree ba apoiantes ne’ebé atus ba atus nakonu iha kampu laran, ekipa susesu deside kontaktu kedan ho CNE munisípiu Ermera hodi muda fali ajenda ba mini-kampania, no kampaña ne’e hetan observasaun direta husi Uniaun Europea, inklui CNE, PDHJ no hetan seguransa másimu husi PNTL munisípiu Ermera.
Jornalista : Agapito de Deus
Editor : Floriano Soares
