Lafaek News— Prezidente Repúblika, José Ramos Horta no líder karimzátiku Kay Rala Xanana Gusmão observa direta fatin inséndiu kuarantena iha aldeia Terra-Santa hodi muda provizóriu vítima uma kain 43 ba cobby-house palasiu prezidente repúblika nia kotuk hodi hetan asisténsia husi governu.
“Ha’u ho Avó Nana vizita ona ba imi nia fatin haree ahi han motuk, imi bele muda fali lai ba fatin ne’ebé ekipa prepara provizoriu hodi asegura kondisaun ba inan no labarik sira,” hateten prezidente Repúblika José Ramos-Horta ba vítima sira.
Iha evakuasaun ne’e, família uma kain hitu deside an ba hela ho família sira iha Tasi-Tolu no Komoro, enkuantu, vítima sira ne’ebé evakua husi Komoro mai fatin provizória, hetan mos asisténsia médika husi pessoal saúde sira, liu-liu ba inan isin rua no labarik.
Hafoin konversa, Xefe Estadu no Xanana orienta kedas ekipa hodi tula vítima sira muda ba uma koby house no buka ajuda mós familia balun ne’ebé deside fila ba hela ho sira nia familia.
Entretantu, Xefe Aldeia Terra Santa Tasi Tolu, Esperança de Jesus hato’o agradese ba PR Ramos-Horta no Avo Nana bele vizita no haree rasik vítima sira nia kondisaun, inklui buka solusaun ba vítima sira.
Autoridade Lokál ne’e kontinua koordena ho Xefe Suku Madohi, Bernardio de Cristo Ferreira ho governu atu hamos hikas fatin ne’ebé ahi han mutuk iha tempu besik.
Komunikandu imprensa média palasiu Presidensial ne’e sita, antes halo vizita vítima sira, Xefe Estadu José Ramos-Horta hamutuk ho Xanana Gusmão, inklui Xefe Kaza Sivil, Bendito dos Santos Freitas, Asessor Politiku, Tomas Cabral iha oras 7H00, organiza ekioa ho apoiu husi Komando F-FDTL, Bombeiros no empreza Pax hamos fatin, instala eletresidade hodi ajuda vítima sira ne’ebé mak atu hela provizóriu
Jornalista : Rita Moniz
Editór : Agapito de Deus
