Lafaek News—Prezidente Repúblika, José Ramos-Horta, Sexta-Feira ne’e, loke forum emprezariál Timor-Leste ne’ebé organiza husi governu Timor-Leste liu husi Trade Invest hamutuk ho Kámara Komérsiu no Indústria Singapura (SCCCI) iha edifísiu SCCCI.
Komunikadu ne’ebé Lafaek News asesu iha media Palasíu Presidensiál ne’e katak, Partisipa iha forúm ne’e, investidór internasionál atus ida resin mai husi Singapura no Europa ne’ebé iha interese atu investe iha Timor-Leste.
“Ohin iha forúm bo’ot ida diak tebes, organiza husi governu no Trade Invest, Embaixada Timor-Leste mai Singapura no Konsellu Emprezariál Singapura. Forúm investimentu ne’e sussesu bo’ot tambá kuaze investór atus ida resin mak partisipa, normalmente tuir ema balun dehan katak, investór interessadu sira mai partisipa ne’e, mai husi rai seluk ne’ebé investe iha Singapura, iha aprezentasaun di’ák tebes husi Timor-Leste, liu-liu Trade Invest no petroleum nian (AMPN) inklui CCI-TL no reprezentante investidór ne’ebé investe ona iha Timor. Ema hotu tuir haré kontente tebes,’’ Dehan Prezidente Repúblika Josè Ramos-Horta iha edifísiu SCCCI, Sesta (10/12/2022).
Tuir Xefe Estadu, vizita ne’e iha reasaun di’ak husi Prezidente Repúblika no Primeiru Ministru Singapura nian, no sai hanesan reforsu ida ba investimentu no adezaun Timor-Leste ba ASEAN, defende nesesidade hadi’a seitór judisiáriu, nune’e bele garante seguransa ba investimentu iha Timor-Leste.
Durante aprezentasaun, Trade Invest introdúz kona-ba razaun Timor-Leste dada investidór no balansu durante tinan rua nulu nia laran, hafoin ida ne’e, iha mos aprezentasaun husi kompañia Internasionál ne’ebé investe ona iha Timor-Leste hanesan Bolloré, East Timor Trade, Timor Plaza, inklui CCI-TL.
Aprezentasaun ikus liu mai husi Autoriedade Nasionál Pretróleo no Minirais hodi esplika kona-ba prossesu investimentu iha Greater Sun Rise ne’ebé dadaun ne’e iha ona akordu atu dada mai Timor-Leste.
Hafoin forum emprezariál, Prezidente Repúblika hamutuk delegasaun kontinua vizita projetu Newater, nu’udár projetu transformasaun bé foer bé konsumu.
“Singapura halo resiklajem ba bé, bé hotu husi dapur, haris fatin, udan ben ne’e hotu sira aproveita halo nia resiklazem, atu sai be konsumu ba ema hotu, ne’e teknolojia ida komplikadu tebes inklui karun, ha’u la fiar ita bele halo, maibé ita bá atu haré no ne’e hatudu lideransa Singapura nian, lideransa ne’ebé sempre buka solusaun ruma ba dezafu ne’ebé Singapura no mundu enfrenta ne’e duni ita buka halo relasaun metin liu tan, nune’e bele halo kapasitasaun ba funsionáriu hotu hodi garante adiministrasaun públika iha Timor,’’ Informa Xefe Estadu Horta.
Ba Xefe Estadu, Singapura rai kiik ne’ebé avansadu ona iha infrastrutura, konservasaun bé no ambiente relasiona ho akesimentu global.
Jornalista : Rita Moniz
Editór : Agapito de Deus
