Lafaek News–Kandidatu Prezidente Repúblika, José Ramos Horta agradese kontinua hetan apoiu hosi juventude foin sa’e no koordenadór Partidu KHUNTO, PLP no Partidu Demokrátiku (PD) postu no munisípiu sira kontaktu hodi apoia iha eleisaun segundu volta iha loron 19 Abril 2022.

Horta konsidera konfiansa hosi KHUNTO, PLP no PD inklui membru nu lider FRETILIN balun nu’udar forsa politika ida hodi fó vitória ba nia hamutuk ho povu Timor-Leste hadia hikas imajen Estadu Timor-Leste.

Premiado Nobel da Paz Ramos rasik hala’o ona enkontru ho Sekretáriu Jerál Partidu Demokratiku, Mariano Assanami Sabino hodi deskute pozisaun Partidu Demokratiku hodi deposita konfiansa votu ba Horta.

Ha’u rasiki ko’alia ona ho ha’u nia alin Mariano Assanami Sabino, ba ha’u la’ós atu buka de’it PD nia votu, maibé dezde uluk PD forma iha tinan 20-liuba, ha’u sempre buka apoiu morál no materiál ba PD no ha’u mós enkontru ho Koordenadór sira hosi Partidu KHUNTO no PLP inklui elementu balun hosi FRETILIN hodi apoia ha’u nia kandidatura,” dehan Horta ba jornalista, hafoin enkontru ho koordenadór Juventude Partidu Demokratiku iha Palapasu, Dili, ohin.

Nia dehan, ho apoiu hosi PD no partidu politikus sira seluk hodi reforsa liután votu ne’ebé nia hetan iha primeira volta hamutuk 303.477 (46,6%) sei sa’e makas liután iha elisaun segundu volta.

Ho apoiu ida ne’e bele reforsa liután votu hamutuk 303.477 (46,6%) ha’u hetan ona, bele sa’e liután hodi hametin dame no hadia ita nia rain bainhira ha’u sai prezidente,” dehan Horta.

Horta dehan, mezmu iha palku politika, Konslleru másimu KHUNTO, Naimori Bukar bele hakuak malu ho Sekretáriu Jerál Partidu FRETILIN, Mari Alkatiri ho Preziente Partidu PLP, Taur Matan Ruak hodi deklara apoia Prezidente Partidu FRETILIN, Francisco Guterres Lú Olo nia kandidatura, maibé votu ne’e povu no militánte sira maka sei deside iha terenu.

Naimori bele ko’alia oin-oin, maibé hakuak nia Kamarada Mari Alkatiri, sira nian rua bele buka kontra Maun Boot Xanana, maibe la’ós sira maka determina, tanba militante KHUNTU rihun ba rihun sei apoia ha’u nia kandidatura hodi vota iha loron 19 Abril agora,” dehan Horta.

Iha semana ida ne’e nia laran, Horta halo ona enkontru no simu kontaktu direita hosi koordenadór partidu PLP, KHUNTU no FRETILIN balun ne’ebé nia labele temi sai sira nia naran, tanba ema hirak ne’e prontu ona atu vota ba nia.

Iha parte seluk, Koordenadór Partidu Demokratiku Munisipiu Dili, Agosto da Costa Soares dehan, sira sente orgullu no agradese tebes hodi hala’o enkontru ho Kandidatu Prezidente Dr. José Ramos Horta hodi deposita sira nia konfiansa no votu ba Ramos Horta.

Ami mai hodi kumprimenta no hato’o parabéns ba maun José Ramos Horta, tanba Partidu Demokrátiku mós iha ninia mekanizmu rasik hodi fó apoiu,”nia hatete.

Entretantu, Premiadu Nobel da Paz, Ramos Horta apela nafatin ba povu no masa partidu politikus sira ne’ebé foin lalais apoiu nia iha eleisaun primeira ronda bele kontinua mantein pozisaun hodi apoia no vota nafatin iha segundu ronda.