Lafaek News—Reprezentante família matebian, Sabino Soares Guntur, Hernani AGustinho Soares, afirma durante ne’e família tomak halo esforsu hodi halo tratamentu maibé la konsege salva tanba nai maromak hadomi liu.
“Família esforsu barak ba nia (matebian) maibé la konsege salva, ida ne’e mak desizaun ikus liu tanba nai maromak hadomi liu nia entaun ita tenki husik nia,” Hernani Agostinho Soares nu’udar matebian Guntur nia primu rasik, kasu lia ne’e ba jornalista sira iha HNGV Bidau-Dili, sábadu (23/01/21).
Hatutan nia hodi rekoñese katak, matebian moras komplikadu tebes tanba ne’e maski ho esforsu tomak ne’ebé família halo maibé moras refere halo susar liután to’o hakotu iis.
“Durante ne’e nia moras komplikadu uitoan, moras diabetes inklui pulmaun mak bubu entaun ida ne’e mak halo nia sai susar,” dehan nia
Hanesan primu rasik matebian nian, nia hatete, família sei entrega ba governu tanba durante matebian sei moris dezde tempo okupasaun fó aan tomak hodi luta no hafoin ukun aan mós nafatin kontribui ba prosesu konstrusaun estadu ka dezenvolvimentu nasionál.
“Ami entrega ba governu para halo planu ba prosesu funerál, ami família hotu nafatin akompaña para governu bele tau ba fatin ne’ebé ho dignu,” afirma nia
Enkuantu matebian moris iha suku Lelalai, postu administrative Kelekai, munisípiu Baukau, iha loron 8 fulan Jullu 1975, hamutuk maun alin na’in hitu kompostu mane 6 feto na’in 1.
Entretantu, Deputadu Sabino Soares “Guntur” hakotu iis iha tuku 5: liu minute balun iha Ospitál Nasionál Guido Valadares (HNGV) Bidau Timor Leste, husik hela oan kiak na’in 5 kompostu husi mane na’in 4, feto na’in ida ho nian kaben.
Antes ne’e observasaun ekipa Lafaek News iha terenu ne’e família matebian, deputadu bankada governu no juventude Partidu Libertasaun Popular marka ona prezensa iha sala mortuario maski kargu polítiko seluk no prezidente PLP atual Xefe Governu Taur Matan Ruak ho membru governu sira seidauk marka ninia prezensa.
Deputadu hirak ne’ebé marka prezensa ona mak hanesan deputadu bankada KHUNTO atual segundu vise PPN Luís Roberto, deputadu bankada Fretilín atual prezidente komisaun B asuntu seguransa José Agostinho Sequeira “Somotxo”, deputadu bankada PLP atual Primeiru Vise Prezidente Abrão Mate Resto no mós koodenadór Gabinete Seguransa iha Parlamento Nasionál Superintendente Asistente Abrão Dias Quintas.
To’o notisia atualidade ne’e hatún ekípa Lafaek News seidauk hetan konfirmasaun hosi parte médiku ne’ebé toma konta halo tratamentu ba matebian kona-ba kauza moras ne’ebe rezulta matebian hakotu peregrinasaun iha mundu ne’e.
Jornalista : Ezequias Tomás
Editoa : Nelya Barros
