Lafaek News—Diretór ezekutivu Hametin Agrikultura Sustentavel Timor Lorosa’e (HASATIL) Gil horaçio Boavida, afirma nia parte dúvida tebes planu MAP nian kada irigasaun natar, 40 hektares aumenta 80 hektares, se loos duni apresiza governu nia vontade dezenvolve setór agrikultura.
“Tan ne’e ami rekomenda ideia no sujestaun sira ne’e ba parte Miniteriu tanba komunidade ho inisiativa rasik, so’e hamutuk osan, aluga kareta hodi ba ke’e no loke kanalizasaun mota ne’e. Espera katak governu bele inklui iha programa no planu ne’ebé sira iha,” katak GIL Horacio Boavida, ba lafaek news iha nia kna’ar fatin ASATIL Faról, foin lalais ne’e.
Diretór ne’e esplika liu husi sira nia auditoria sosiál liga ho kazu agrikultura ne’ebé indentifika iha munisípiu sira, liu-liu munisípiu Kovalima postu administrativu Suai katak mota Mola ho Tafara nia kanalizasaun be’e hodi fornese ba agrikultor sira iha Suai Loro ho Usikain ne’e deteminante tebes.
Tuir observasaun HASATIL nian katak se governu iha planu ne’ebé di’ak ezekusaun orsamentu tinan ida ne’e ministériu presija fó ona atensaun ba munisípiu Vikeke, Mantutu, Baukau, Maliana, Same no Suai inklui mós Oe-kusse, tanba area hirak ne’e fatin produtivu ba natar atu hasa’e produsaun hare.
“Fatin sira ne’e iha produtividade maibé presija iha irigasaun ne’ebé di’ak no presija mós hasa’e koñesementu produtór sira nian no hare ba efetividade servisu extensionista sira liu-liu ba sira nia nesesidade operasional sira atu nune’e halo fasíl sira nia servisu iha alvu refere,” dehan nia
Nune’e haree ba kada irigasaun atu kobre hetares 40 to’o ba 80 ne’e depende ba volume be’e nia bo’ot hanesan tuir planu ministériu nian atu estabelese Checkdam, maibé haree mós ba nia impaktu ambiental no presija aprende husi rai seluk atu ninia benefisiu bele kobre mós area sira seluk hanesan turizmu no ambiente.
“Ko’alia kona ba produsaun hare, ita labele haree de’it husi parte irrigasaun, tanba asuntu ne’e integradu tebes, Ita presija haree ba irrigasaun, fini, produtividade servisu ema nian husi ida ne’e mak ita bele garante sustentabilidade produsaun hare,” nia hakotu.
Jornalista : Felisberto da C. Fernandes
Editora : Nelya Barros
