Lafaek News–Maria de Martins Ho nia kaben Daniel Musa, hamonu mata-wen iha oan nain tolu nian oin, tanba laiha osan atu sosa material hodi hadia uma ne’ebe kondisaun la dignu ona atu sira bele hamahan an hakmatek iha tempu udan no anin boot.
Ha’u hakarak hadia ha’u nia uma ,tanba udan mai ne’e ami nia uma ne’e ami tur la diak, kalen dodok hotu ona, kalen ne’e dezde tempu Indonezia nian seidauk troka, fatin mos la seguru mai ami tanba ami laiha dalan atu liu, tempu udan ne’e ita muda ba mai mos udan ben kona nafatin , ami toba la diak, muda sasan ba fatin ne’ebe udan la kona hodi toba de’it aban fali hare udan para fali Habaí halo maran hodi toba nafatin,” haktuir Maria de Martins ho matan wen ba Lafaek Nesw iha nia rezidensia Beto Leste, suku Madohi postu Don Aleixo, foin lalais ne’e.
Uma ne’ebé da-daun hamahan Maria ho Nia kaben inklui oan nain tolu, piku ne’ebé didin helu uma lahuk hotu ona, kalen iha uma kakuluk fruzen da-daun, tanba uma ne’e harii dezde okupasaun Indonezia nian too ohin seidauk troka kalen ho piku, iha tempu udan dalan laiha atu halai salva an husi dezatre naturais bainhira iha tempu udan rezulta mota Komoro tuun ho korrente toos.
Haree ba kondisaun moris ne’e Maria ba deside ba servisu iha Otel ida iha Dili laran ne’e ho salariu fulan dolar 95, hodi sustenta de’it moris loro-loron, maibe susar atu hadia uma ne’ebe kondisaun grave liu ona.
Ha’u serbisu iha hotel maibe situasaun covid-19, entaun loron ida tama loron la tama, fulan ida hetan dolar 95, ami han mos la too ida, pois ha’u nia oan mane boot ho nia oan, hela hotu iha ne’e, ami uma laran hamutuk nain 10, Maria ko’alia ho matan wen.
Situasaun hirak ne’e hanesan teste ida husi maromak, tenke metin ho fe ba maromak orasaun mak tenke forte atu nune’e bele fo solusaun ba problema hirak ne’e iha loron tuir mai.
Moris tenke pasiensia moris ne’e maromak koko ita nia fiar atu moris bele ka labele mos pasiensia ba malu hodi manan buat hotu, hanesan ita manan bikan ida ba moris,” haktuir inan kbiit laek ne’e.
Atu remata, kbiit laek ne’e husu governu atu hadia povu nia moris, labele hanoin de’it ba sira (governu) nia moris hodi haluha tiha povu kiik sira ne’ebe terus ba aihan no hela fatin la dignu, tempu too ona atu hasai povu sees husi kiak no mukit, no tempu too ona atu povu moris kontente.
Estajiada : Crisencia Ferreira
Editor : Agapito de Deus
