Lafaek News- Primeiru Ministru Taur Matan Ruak, hala’o sorumutu ho Embaixadór Korea parte Súl, Kim Jeong-Ho, ho objetivu atu hametin kooperasaun entre rai rua liu hosi area espesífiku liu-liu Taekwondo no haruka traballadór Timor-oan ba servisu.
Xefe governu afirma, agradese tebes ba servisu hamutuk durante ne’e nasaun rua hala’o, no agradese mós ba apoiu ne’ebé durante ne’e governu no povu Korea Súl oferese ba nasaun doben ne’e, liuliu bele fasilita joven sira ba servisu no mós halo dezenvolvimentu ba área desportu hanesan Fútebol no Taekwondo.
“Agradese tebes ba kooperasaun Timor ho Koreia liuhosi empregu Timoroan ne’ebé servisu iha Koreia, la’ós de’it iha skill ba servisu no buka osan maibé sira mós iha skill hodi hametin relasaun di’ak entre ema ho ema iha rai rua ne’e,” PM Taur ba jornalista iha Palassu Governu segunda semana ne’e.
Alende ne’e iha fatin hanesan Embaixadór Koreia Súl, Kim Jeong-Ho hatete, sira sei nafatin habelar liután programa SAEMAUL UNDONG iha munisipiu 13, atu nune’e povu labele dependente de’it ba governu maibé sira rasik dezenvolve setór importante hodi benefisia ba sira aan rasik.
Tanba ne’e dehan nia hodi reforsa, bainhira situasaun normal hikas (EE ramata) hakarak no sei fasilita tan traballadór sira ba servisu iha nasaun Korea Súl.
Jornalista : Juvita dos Santos
Editór : Ezequias Tomás
