Lafaek News-Diretór Asossiasaun HAK, Sisto dos Santos nota katak, situsaun konfrontasaun ne’ebé akontese entre joven sira ne’e, kulpa orgaun Parlamentu Nasionál (PN) nian tanba orgaun laiha komitmentu atu aloka orsamentu ka investa ba joven sira hodi sai tranformadór sosiál.
“Ita atu fó kulpa ba sira, ha’u hanoin ne’e la justu tanba sira ne’e hanesan pasiente moras ne’ebé governu presiza kura la’ós atu fó kulpa. Problema ne’e mosu tanba tinan sanolu ona ita nia orgaun Parlamentu la iha komitmentu no aloka orsamentu la liu pursentu sanolu husi montante OJE,” dehan Sisto liu husi via whatsapp, Sabádu (27/03/2021).
Nia hatutan, seluk mós Parlamentu Nasionál la investe maka’as iha area agrikultura ne’ebé mak la liu pursentu tolu, investimentu ba bee moos la liu pursentu ida, oinsa mak povu kbiit laek sira nia esperansa moris ne’e bele iha serteza.
Parlametu nasionál la prioritiza area edukasaun, defaktu hatudu, edifísiu eskola balun tempu Indonézia uza to’o mai agora ho kondisaun aat, kuaze iha sala laran simente nakfera hotu, bee moos laiha, fatin biblioteka, armazen la iha.
“Eskola sira ne’e povu kbiit la’ek nia oan mak ba eskola iha ne’ebá maibé ministru, deputadu, prezidente, sekretáriu esdatu, diretór jerál nia oan sira ba asesu eskola ne’ebé iha kualidade hanesan eskola internasionál, tanba ne’e ita atu fó kulpa ba joven sira ha’u hanoin ne’e sala,” tenik nia.
HAK fiar, joven sira ne’e mak sai alvu ida ba libertasaun nasionál no se mak durante ne’e abandona ida ne’e mak parlamentu nasionál, sira prioritiza ba sira nia kareira, poder sira maibé poder sira neé la’os pur méritu ka pur akademia maibé ne’e povu mak fó konfiansa ba sira no sira hetan prestíziu ne’e sira abandona povu.
“Tinan tinan, fulan fulan, semana semana sira ba halo fiskalizasaun nia rezultadu ne’e zero, sira la’ós ba fiskalizasaun maibé ba piknik, sira dehan ba konsolidasaun ne’e ba curhat de’it. Tanba ne’e kulpa ne’e orgaun parlamentu nasionál,” kestiona Nia.
Governu labele halo buat ida, SEJD, Ministériu Edukasaun labele halo buat ida, se Parlamentu nasionál la investe osan ba joven, tanba save ida atu aloka osan ne’e parlamentu nasionál no parlamentu nasionál mak reprezenta lian povu ida ne’e, maibé agora sira laiha ona lian.
“Lian ne’ebé agora sira iha ne’e la’ós ona reprezenta povu, maibé reprezenta sira nia família, grupu, no sira nia partidu polítiku. Parlamentu nasionál hatudu nia inkapasidade polítikamente no intelektualmente no HAK konsidera ne’e derotasaun bo’ot ida durante nia esperensia desde tinan sanolu, osan sira ne’e sira privatiza ba sira nia kareta luxu no pensaun vitalisia,” Nia hakotu.
Jornalista : Felisberto F. da Costa
Editór : Floriano Soares
