Lafaek News—IX Governu KonstitusionaSekretariu Estadu Formasaun Profesional no Empregu (SEFOPE), Kuarta 06/11/2024, iha ne’ebé realiza serimonia despedida ho traballador 104, kompostu feto 11 no mane 85 atu tempu badak aranka servisu iha nasaun Korea do Sul.
Diretor Direasaun Nasional Empregu Estranjeiru (DNEE), João Correia Pereira, informa traballador hamutuk 104, kompostu husi mane 85 no feto 11, husi númeru ne’e rasik traballador ne’ebé re-entry hamutuk 8 no foun 96.
“Diretor hatete, bainhira traballador sira atu ba servisu iha nasaun sira hanesan Korea ho Australia, ami sempre realiza seremonia despedida entre familia traballador ho govervu Timor-Leste molok desloka sira ba Korea do Sul, husi númeru traballador hirak ne’e servisu iha area rua hanesan peskas ho fabrika, kompostu husi mane 85 no feto 11, husi númeru ne’e tuan hamutuk 8 no foun 96, ohin loron marka diferente tebes ho loron sira liu ba, tanba loron ohin feto hamutuk 11 mak atu ba servisu iha nasaun Korea, iha area fábrika,” João Correia sublina.
Nia husu ba traballador hotu tantu feto ho mane, ba servisu iha nasaun Korea imi reprezenta ita nia estadu, la’os ba individu, tanba governu husu ba ita boot sira tenke disiplina, tanba iha nasaun korea servisu tenke tuir oras, tan ne’e husu ita boot sira tenke prepara mentalidade halo diak hodi hasoru situasaun foun.
“Ita boot sira tenke hatudu espíritu badinas iha ema nia rai, tanba ita nia númeru traballador illegal sae makas iha nasaun Korea, tan ne’e governu Korea ne’ebé servisu hamutuk SEFOPE, liuhusi Diresaun Nasional Empregu Estranjeiru (DNEE), fó ona atensaun ba traballador timor-oan, tanba ne’e, traballador sira ne’ebé mak sai ona husi Sistema ema fó ona voluntariamente ba sira to’o Dezembru tinan ne’e, tenke sai husi nasaun Korea mai Timor-Leste, sé sira la sai signifika governu Korea sei halo medida ruma hodi deporta ka kaer sira”, Diretor DNEE, informa.
Maske ita hotu hatene katak, númeru dezempregu a’as tebes iha Timor-Leste, maibé traballador sira bainhira ba mak halai sai husi Sistema, saida mak imi sei kontribui, ida ne’e hatudu imajem ida ne’ebé la diak hodi halakon fiar ho empregador sira hodi fó servisu ba maluk timor-oan sira seluk ne’ebé hakarak ba servisu hanesan ita boot sira.
“Iha fulan rua liu ba ita halo despedida ba traballador 240 no ohin ita halo dezpedida ba traballador 104, ho númeru ne’e, ita fiar katak sei aumenta liu tan bainhira imi hotu bele kontribui, kontribui liuhusi ita boot sira nia atitude, tanba ne’e, ami husu ba traballador sira hotu, tantu sira ne’ebé re-entry, tenke fahe informasaun diak ba kolega sira hotu, labele influénsia sira ne’ebé seidauk hatene, tanba traballador barak iha ne’eba kleur hatene dalan barak hodi lori traballador balun halai sai husi Sistema no balun servisu labele, entaun sira husu karta autorizasaun hodi muda fali ba fatin seluk, ne’e parte diak, maibé ida ne’ebé la diak mak sai sein koñesimentu husi empregador sira”, Diretor DNEE ne’e rekomenda.
Entretantu traballadora Merianti Tuati, hatete katak nia senti kontente tebes ho oportunidade ne’ebé mak nia hetan hodi ba servisu iha nasaun Korea do sul iha area fabrika durente tinan 4 fulan 9, tanba hanesan joven iha mehi ka planu ne’ebé barak hodi buka servisu, maibé husi mehi ne’ebé nia lutan tinan naruk nia laran, ohin loron bele atinji duni tuir planu Maromak nian.
“Tanba ne’e, nia agradese tebes ba Maromak ho planu hotu ne’ebé mak durante tinan naruk nia laran nia luta no ohin loron bele atinji duni mehi ida ne’e, tan ne’e husi oportunidade ne’ebé nia hetan hodi ba servisu iha nasaun Korea ho objetivu ida katak buka osan hodi hadia familia nia moris, nune’e mós husi esperiensia ne’ebé nia hetan sei fahe tutan ba maluk joven sira seluk ne’ebé la hetan oportunidade hanesan ami,” Merianti haktuir.
Merianti dehan, husi esperiensia servisu ne’ebé nia hetan hodi ba servisu iha korea do sul, fila mai Timor nia sei kria grupu ida kona-ba hakiak animal hodi fó servisu ba maluk timor-oan sira ne’ebé mak laiha servisu, tanba ne’e husu ba maluk joven sira hotu ketan lakon esperansa, nafatin tau planu hotu iha Maromak, fiar katak buat hotu Maromak sei loke dalan ba ita, importante mak tenke iha mehi no mehi ne’ebé ita iha labele baruk no kolen atu luta. Traballadora Merianti hakotu.
Jornalista : Crispin de J. Amaral
Editor : Agapito de Deus
