Lafaek News–Governu liuhusi enkontru Konsellu Ministru (KM) aprova rezolusaun kona-ba politika nasionál Ensinu Superiór hodi konsolida setór ensinu Superiór Nasionál.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, projetu ne’e halo kriasaun ba polítika ne’ebé ho hakarak atu konsolida, estabiliza no armoniza setór ensinu superiór nasionál, hodi permite ho dalan ne’e atu kumpri dever Estadu Direitu ba edukasaun ho kualidade no hodi potensia kreximentu ida ne’ebé sustentavel liu iha setór ne’e ba futuru dezenvolvimentu país nian.
Projetu ida ne’e lori ita ba kriasaun politika ida ne’ebé diak liu tan, ne’ebé mak sei konsolida no armoniza iha setór ensinu superior nasionál, nia permite ho forma ida ne’e halo ita bele iha ensinu Superiór ida ne’ebé iha kualidade, liu-liu no haree mós ba iha dezenvolvimentu setores ensinu superiór iha futuru tinan hirak tuir mai” dehan MPKM Fidelis ba Jornalista hafoin remata enkontru KM iha Palasio Governu Dili, sesta (10/12/21).
Neduni importante atu promove polítika ensinu superiór ida ne’ebé bele prosege prinsípiu igualdade, universalidade no, aleinde ne’e, atu realiza interese públiku nasionál.
Tanba ita presiza atu politika ensinu ida ne’ebé maka bele tuir prinsipiu sira hanesan igualdade, universalidade no asimitudu ida ne’ebé mak bele halo ita atinji interese públiku nian ou interese nasionál sira no ita tenke organiza ita nia ensinu Superiór ne’e ho diak maka politika ida ohin ne’e ajuda para governu bele iha hanesan métodu ida, forma ida hanaran politika nasionál ba ensinu Superiór para bele ajuda ita atu iha setór edukasaun liu-liu iha ensinu Superiór ida ne’ebé mak ita kualidade, ida ne’ebé mak bele kompete ho ensinu Superiór iha nasaun sira seluk,” hakotu Fidelis Magalhães.
Enkuantu projetu rezolusaun Governu nian kona-ba Polítika Nasionál Ensinu Superiór refere aprezenta husi Ministru Ensinu Superiór, Siénsia no Kultura, Longuinhos dos Santos.
Jornalista : Juvita dos Santos
Editor : Agapito de Deus
