Lafaek News–Governu liu husi Konsellu Ministru (KM), kuarta (01/12/2021) ofisialmente aprova projetu deliberasaun hodi Halo ezonerasaun no nomea Xefe Estadu Maior Forsas Armadas (XEMFA)  “Coliati” no Komandante instituisaun Komponente F-FDTL sira.

Ministru Prezidénsia no Konsellu Ministru (MPKM), Fidelis Manuel Leite Magalhães,  hateten, ohin Ministru Defeza propoin ba Primeiru Ministru kona-ba alterasaun sira no nomeasaun balun iha insituisaun F-FDTL nia laran.

“Proposta ne’ebé ohin hato’o ne’e atu halo nomeasaun foun ba Xefe Estadu Maior Forsas Armadas Hato’o alterasaun no mudansas balun troka XEMFA atuál nomós Komandante Komponente Sira,” dehan Fidelis hafoin remata enkontru KM iha Palasíu Governu Dili, kuarta (01/12/21).

Fidelis,  akresenta, Xefe Estadu Maior Forsas Armadas (XEMFA) mak atualmente ezerse hela kargu ne’e mak Brigadeiru Jenerál Coliati,  Enkuantu governu propoin ba Prezidente Repúblika hodi halo desizaun ikus liu, Alterasaun sira kargu iha forsa frmadas ne’e akontese, ne’e medida ida ne’ebé kontribui nune’e Forsas Armadas bele sai profesionál liu, tanba iha forsas armadas importante iha koñesimentu iha área hotu-hotu iha Forsas Armadas, ne’e faz parte iha kareira militar.

“Hau prefere atu labele adiante lai naran sira, tanba governu propoin ona ba iha ita nia Prezidente Repúblika no desizaun ikus ne’e sei husi Prezidente Repúblika, diak liu naran sira aprezenta ona ba prezidente Repúblika mak depois sei divulga ba públiku, ” hakotu Fidelis Magalhães.

Jornalista         : Juvita dos Santos

Asisten Editór : Egidio Nono