Lafaek News—Governu liu husi reuniaun Konsellu Ministru aprova projetu Dekretu-Lei atu kria subsídiu mensál transporte nian ba titulár sira iha kargu diresaun no xefia nian no ba funsionáriu sira Administrasaun Públika nian atu substitui atribuisaun veíkulu sira Estadu nian.
Ministru Prezidénsia no Konsellu Ministru (MPKM) Fidelis Manuel Leite Magalhães hateten, kriasaun ba subsídiu ida-ne’e atu kompensa kustu regulár sira husi benefisiáriu sira relasiona ho transporte no mós atu hamenus despeza husi atribuisaun veíkulu sira Estadu nian no promove rasionalizasaun ba parke automóvel públiku.
“Montante mensál subsídiu nian ho valór US$ 25 ba funsionáriu públiku sira, US$ 50 ba Xefe sira sesaun nian, US$ 75 ba Xefe sira Departamentu nian, US$ 100 ba Diretór-Nasionál sira no US$ 150 ba Diretór-Jerál sira,” dehan Fidelis ba Jornalista hafoin remata enkontru KM iha Palasio Governu Dili, segunda (20/09/21).
Governante ne’e akresenta, kalkula katak medida ne’e permite atu alkansa poupansa ida liu dolár amerikanu rihun US$700 kona-ba kustu atuál akizisaun no manutensaun ba veíkulu sira no kombustivel nian.
Jornalista : Juvita dos Santos
Editór : Pedro de Almeida
