Lafaek News–Ernestina Pereira (29) hanesan feto ida ne’ebé inovativu no insipirador husi suku Leuro, postu administrativu Lospalos munisípiu Lautém. Iha tinan kotuk, hamutuk ho nia membru grupu na’in sia desidi atu hola parte iha atividade produsaun mina nu’u ne’ebé organiza husi Ai ba Futuru liu husi KOLPING. Sira aprende kona-bá oinsá atu halo produsaun mina nu ho kuantidade bo’ot ho kualidade ne’ebé diak. Inisiu la fasil ba sira maibe agora ema barak koñese sira nia produtu ho naran “Mina Nu Kolping.” https://www.lafaeknews.tl/uza-material-transforma-nuu-ba-mina-ho-kualidade-diak/
Prosesu mina nu ho manual persija tempu ho enerjía barak , hahú husi hamós nu to’o hafalun. Atu hasa’e sira nia produsaun, grupu sosa ekipamentu prosesu te’in mina nian no mós basian ho tasu. Kada semana sira sosa 150 nu husi komunidade lokál, kada fuan nu ida ho presu $0.10 centavos. Iha prosesu te’in mina ne’e rasik, etapa primeiru sira tenki hamós nu ne’ebé atu te’in depois dulas ho makina dulas nu’u ne’ebé apoiu husi projetu Ai ba Futuru. Rezultadu ne’ebé sira hetan husi fa’an sira nia produtu mina ne’e agora sira sosa ona mákina foun ho presu $1.600, ne’ebé ajuda tebes sira atu prosesu halo produsaun mina nu’u.
Agora sira produz mina nu 25-liter resin iha kada semana. Presu kada liter mina hanesan presu $1 ba 600 mililiter, 1.500-liter ho presu $2.50, no presu $8.00 ba 5-liter nian. Bazeia ba sira nia esperiensia, sira nia produtu sempre hotu hafoin produsaun.
Aliende sira fa’an iha Lospalos, sira mós iha kliente husi munisípiu seluk hanesan Baucau ho Dili. Maske difikuldade iha transporte tula sira nia produtu ba merkado. Dalaruma sira fó tuir bis tula sira nia produtu lori ba sira nia kliente iha Dili. Kliente sira husi Baucau tula sira nia produtu ho sira nia transporte rasik iha fatin produsaun, nune’e mós ba kliente sira iha Lospalos, ne’ebé vizita direitamente sira nia fatin hodi sosa sira nia produtu.
Iha January 2022, Ai ba Futuru realiza ona eventu ida kona-bá Negósiu Agrofloresta iha Hotel Timor, iha eventu ne’e hetan partisipa husi parte interesada sira ho benefísiariu husi ami nia tarjetu unisípiu hanesan Baucau, Viqueque ho Lautém. Iha eventu nia laran sira halo promosaun ba sira nia produtu rasik husi sira nia munisípiu, aliende ne’e sira mós halo aprezentasaun kona-bá sira nia planuiha futuru oinsá atu maneja sira nia negósiu rasik.
Grupu sira ne’ebé suporta husi KOLPING mós hola parte iha eventu ne’e. Ernestina nu’udar reprezentante husi nia grupu hateten, “foun-foun ami la iha hanoin katak ema sei sosa ami nia produtu, maibe ikus ema sosa hotu ami nia produtu, bao in ami sei serbisu makas liu tan hodi bele hadia ami nia serbisu diak liu tan.”
Agora sira produs mina nu barak liu tan tamba kliente aumenta barak. Liu husi historia ida ne’e, mai ita fahe sira nia kreatividade ho inisiativa atu bele fó inspirasaun ba ema seluk katak, ita labele tauk atu kria serbisu rasik. Mai ita aprende husi Ernestina ho nia grupu ne’ebé bele kria sira nnia negósiu rasik ho ida ne’e sir abele sustenta sira nia família.
