Lafaek News–Partidu Frente-Mudança (P-FM), liu husi Kooperativa Pekuária Juventude Rosario (KPJR), sesta (23/07/2021), distribui fahi oan hamutuk 4 ba membru kooperativa ho intensaun hakiak hodi suporta ekonomia uma laran.
Koordenadór Frente-Mudança munisípiu Dili, Cesaltinho Alves Ximenes, afirma kriasaun ne’ebe oferese husi P-FM, maske kiik maibé tenke havale (valoriza) no kuida sai boot, bainhira komesa husi kiik sai boot hanesan kosar-ben rasik.
“Ita komesa ho kiik mak sai boot ne’e ita nia kosar-wen, hanesan Mate-Mátika mai ho zero mak primeiru, entaun ita komesa husi zero, ida ne’e la’os buat boot ida husi Frente-Mudança lori mai fo ita boot sira, ita boot sira mak tenke valoriza hodi sai boot,” katak Cesaltino Alves Ximenes iha diskursu hafoin entrega fahi ba grupu KPJR iha aldeia Metin-4, suku Bebonuk sesta semana ne’e.
Koordenadór FM munisipiu Dili ne’e, promete ba oin sei halo treinamentu oinsa hakiak fahi atu hodi iha motivasaun nune’e kriasaun ne’e bele la’o ho susesu.
“Ha’u hanoin ita iha esperiensia oinsa fo han fahi atu depois fahi bele sai boot, maibé ita presiza aprende seluk tan, tanba fahi ne’e ho nia rasa boot husi Indonezia, entaun nia hahan ne’e apropiadu, nune’e imi presiza hetan treinamentu husi ami nia ekipa atu produz hahan fahi nian,” Cesaltina argumenta.
Cesaltinho husu grupu kooperativa Pekuária Juventude Rosario atu labele dúvidas, tanba ekipa partidu nian sei akompania too iha tinan 1 nune’e bele antisipa bainhira iha dezastre ruma ezemplu fahi ida ka rua mate, maibé labele tauk se fahi ida ka rua mate bele troka fali hodi hakiak kontinua.
“Fahi ne’e mate ita bele troka fali, labele tauk importante mak ita boot sira tenke iha esforsu makas oinsa bele iha susesu ba kriasaun ne’e,” Cesaltinho hakotu.
Iha fatin hanesan Grupu Kooperativa Pekuária Juventude Rosario, Rosalina de Araujo, espresa nia sentimentu haksolok ho fahi ne’ebe oferese husi partidu Frente-Mudanca liu husi koordendor paritdu FM munisipiu Dili nian, durante ne’e partidu sira seluk la hanoin oinsa hadia povu kiik sira nia moris, maibe too iha loron kampania mak foin hakbesik ba povu hodi husu votus.
“Ha’u sente kontente hodi simu ho liman rua, hau fo obrigadu barak tebes ba partidu Frente Mudanca mai ajuda ha’u, durante ne’e ha’u bele partidu sira seluk más nunka ajuda hau nia moris, ha’u simu ho liman rua ba Frente-Mudança nia ajuda ne’e,” dehan Rosalina hafoin simu fahi oan 4 husi koordenador PFM munisipiu Dili iha aldeia Metin-4.
Rosalina relata, iha grupu Kooperativa Pekuária Juventude Rosario membru hamutuk 15, nune’e sei servisu hamutuk hodi kuidadu fahi ne’e bele sai boot hodi produz fali fahi oan barak hodi fahe tutan ba maluk sira seluk ne’ebé presiza hakiak fahi.
“Ami sei respeita no hadomi fahi ne’e tanba aban bainrua sei hadia ami nia moris liu husi selu oan sira nia eskola no nesesidadae uma laran,’’ Rosalina subliña.
Prezidente Interinu Partidu Frente-Mudança, Egidio de Jesus, reafirma programa kooperativa ne’e la’os foun, maibé la’o tuir de’it saudozu sira nia filozofia polítika no idoiolójika libertasaun do povu depois de restaurasaun independénsia 20 de Maiu 2002, Frente-mudanca halo prátika tuir saudozu sira ain-fatin, maske Frente-mudanca kadeira ida de’it iha parlamentu nasionál, maibé ho kadeira ida ne’e hakarak hadia povu nia moris liu husi kooperativa hakiak fahi ho manu lori bee mos no instalasaun liña eletrisidade ba povu maubere sira nia nesesidade dezde okupasaun Portugeza tinan 450 no tinan 24.
”Duke, estuda lai iha aitarak-laran hodi sobu lai, publika kandidatu prezidente repúblika 2023-2027, la titu dekretu lei husi prezidente sobre lei eleisaun prezidensiál hodi publika lai no haksoit lai kontra lei, Anak emas ba partidu ida, anak perak ba partidu seluk, publika lai haksoit lai, Frente Mudanca rezeita opsoens politika hirak ne’e hodi tau iha prátika fahe lai fahi ba halo povu maubere niia ekonomia moris lai,” katak Egidio de Jesus.
Egidio mos husu ba povu atu matan moris neon nain ho konsiénsia mook atu vota ba lia loos no dalan loos, nune’e iha ikus labele dehan lider sira iha kampañia promete lalehan ikus mai lori infernu ba povu maubere sira, maibé Frente-Mudanca rezeita polítika obsukurantimzu ne’e.
Frente mudanca nia esforsu liu husi kooperativa aldeia no suku lubun asesu ona nesesidade bázika hanesan eletrisidade, bee moos, ai-gaharu, hakiak fahi no hakiak manu inklui sosa Nuu hodi exporta ba Singapura, programa ne’e hahú iha fulan Marsu 2018 too ohin 23 Jullu 2021, infelizmente paradu uituan tanba serka sanitária.
“Ami nia programa kooperativa ne’e la halo inovasaun foun, maibé ami hatoo saudoza sira nia programa libertasaun do povu, ne’e tau iha prátika ba libertasaun povu, ami laiha buat seluk, ami halo buat ida kumiñal ne’ebé uluk ha’u sei idade 14 iha UNTIM halo tuir ida ne’e, no ohin ha’u nia oan nain rua ida ran husi saudozu Nicolau Lobato no ida ran husi Vicente Reis Sahe (ha’u nia profesor polítika), ohin ita tau sira-nia polítika ne’e, ami fiar povu ne’e han isin sikat ruin sei vota ba Frente-Mudanca iha 2023 mai,’’ Prezidente Interinu P-FM ne’e fundamenta.
EKipa kobertura : Lafaek News
Editór : Agapito de Deus
