Lafaek News—Orgaun Konsellu Imprensa (CI-Siga Portugés), tersa (08/10/2024), realiza espozisaun foto jornalízmu iha ámbitu selebrasaun loron nasional liberdade imprensa ne’ebé loke husi Vise Primeiru Ministru, Ministru Coordenador dos Asuntus Sociais no Ministru Dezenvolvimentu Rural no Habitasaun Komunitaria, Mariano Assanami Sabino Lopes iha resintu CI, Kintal-bo’ot, Dili.
Iha diskursu, Prezidente Konsellu Imprensa, Otélio Oté hateten, ohin hahú semana ambiente loron liberdade imprensa ho feira ida produtu foto jornalistiku, hatudu katak fotografia nu’udar meius informasaun ida ne’ebé ko’alia liafuan rihun resin iha foto ida no bele intrepreta foto ida ho nia signifikasaun.
“Foto ne’ebé CI tau iha feira ne’e, foto katuas ona liu husi meius komunikasaun sosial sira, imprime liu husi ajensia lokal sira, internasionál sira iha momentu ne’eba,” Dehan Prezidente Konselho imprensa Otelio Ote iha ninia diskursu ba espozisaun foto jornalistiku, iha Kintal-bo’ot (08/10/2024).
Prezidente CI ne’e haktuir tinan ida ne’e konsellu imprensa selebra loron Nasional Liberdade imprensa iha Balibo ba dala rua, hafoin Parlamentu Nasionál aprova loron Nasional ne’e iha tinan 2 kotuk.
Jornalista senior ne’e afirma, loron segunda feira semana oin mai CI sei feira produtu lokal ida hamutuk ho komunidade sira iha Balibo, depois iha kuarta feira sei iha forum Nasional editor ho editor sira, xefe redasaun sira, Jestor sira atu koalia kona ba saida mak ita liu tiha ona durante iha tinan ruanulu resin nia laran, saida mak ita hanoin iha tinan hirak tuir mai no mos sei aprezenta dezafiu sira no buka dalan rezolve instituisionalmente ida-idak lao. Loron 16 outobru ita sei selebra loron Nasional Liberdade imprensa, iha momentu hanesan ita sei atribui premiu media ba jornalista sira ne’ebé hakerek diak liu.
“Premiu media ne’e CI foti premiu sira ne’ebé importante ba media ne’ebé hatudu nia preforma di’ak durante tinan hirak nia laran hanesan jestaun iha kualidade produtu, kualidade aprezentasaun ba publiku,” tenik eis jornalista TVE, kona-ba Premiu media ne’e ekipa ida husi CI halo ona avaliasaun ba sira ne’ebé iha direitu atu hetan premiu iha loron Nasional Liberdade imprensa nian, kada tinan CI sempre halo premiu media, espera katak tinan oin no tinan 9 tan iha tan kategoria barak tan ba presenter diak liu, reporter di’ak liu, investigativu diak liu ne sei akontese hanesan ohin dehan tinan 3 mai ita habuaras liu tan konsellu Imprensa nia prezensa, Ami mos kontinua halo sensibilizasaun kona ba lei komunikasaun sosial no sensibilizasaun ba autoridade lokal sira husi Munisipiu sira, Espera katak ita iha komprensaun hanesan kona ba ejistensia konsellu imprensa, ejistensia media no ejistensia jornalista sira,” dehan Prezidente CI Ote.
Iha fatin hanesan Vise Primeiru Ministru, Ministru Coordenador dos Asuntus Sociais no Ministru Dezenvolvimentu Rural no Habitasaun Komunitaria, Mariano Assanami Sabino Lopes hateten, loron Liberdade imprensa ne’e importante ba ita hotu, loron ida ne’ebé ita hotu halo refleksaun, fo onra, fo Gloria ba sira ne’ebé la iha ona iha ita nia let, ba sira nia luta ne’ebé husik hela hodi ita sira ne’ebé kontinua mantein servisu, nafatin esforsu hodi garante liberdade imprensa.
“Iha prosesu naruk mos Timor oan barak mak esforsu makaas hodi fo sai lian laek sira nia lian no fo sai informasaun rai laran nian iha media oi-oin ne’ebé ita kria iha tempu rejistensia hanesan vox populi, hanesan tatilakum (tatilakum ne’e katak halo ita la toba, hader hela de’it/ media iha rejistensia halo informasaun alo ema la toba) , iha Suara Timur-Timur ne’ebe iha tempu ne’eba ita hari’i iha rejistensia konsege bele hasa’e informasaun lubuk ida,” .
Vise PM ne’e afirma, Media sira ne’ebé iha tempu Indonesia hari’i ne’e sempre iha parte ida, halo koperasaun maibe nafatin fo sai informasaun ne’ebe importante ba liur liu husi media unidade, media Liberdade ikus liu hari’i Vox populi iha 1999.
“Tanba ne’e iha loron importante ne’e husu ba media hotu-hotu atu kontinua no jornalista hotu-hotu luta nafatin hodi haklaken lia los no garante mandatu Konstitusionál ne’ebé mak povu hotu-hotu tenke asesu informasaun ne’ebe los, asesu informasaun ne’ebe direitu povu nian, iha direitu ko’alia iha media no iha plataforma oioin,” katak Assanami
Observasaun lafaek news nota iha espozisaun foto jornalistiku ne’e hetan Partisipa husi Eis Primeiru Ministru VIII governu nian, Taur Matan Ruak, Vise Primeiru Ministru, Ministru Coordenador dos Asuntus Sociais no Ministru Dezenvolvimentu Rural no Habitasaun Komunitaria, Mariano Assanami Sabino Lopes, Ajénsia Nasional no Internasional sira, Media nain sira no Konselho imprensa nia parseiru sira inklui Jornalista sira.
Jornalista : Gracia Soares
Editor : Agapito de Deus
