Lafaek News–Prezidente Interinu Partidu Frente Mudansa, Egidio de Jesus, afirma FM iha komitmentu ho kadeira ida hakarak hadia povu kiik sira nia ekonomia liu husi kooperativa hakiak fahi ho manu iha territorial Timor Leste.
‘‘Ha’u ba ona iha Baukau, embora iha serka sanitaria hela, tenke kumpre regras estadu nian, hau vasina kompleta ona bele sirkula ona iha momentu oportunidade ne’e,’’ katak Prezidente Interinu FM, Egidio de Jesus ba lafaek news iha Nia rezidensia Likintai foin lalais ne’e.
Maibe, Prezidente Interinu FM ne’e sente preukupasaun, tanba mosu fali serka sanitaria ida ikus ne’e maske ema vasina kompleta ona, maibe labele sirkula, hanesan labele asesu ba munisipiu Ermera, maibe Frente-Mudansa iha programa inaugurasaun tanke bee mos, ne’ebe konstrui ho osan subensaun publiku husi kadeira ida nian hodi ajuda kore povu husi krize bee moos.
‘‘Lolos ne’e ami atu inaugura tanke bee mos iha loron 11 fulan Agusto liuba, la konsege tanba lockdown, maibe atividade kooperativa ne’e la’o nafatin foin da-daun ami fo fahi ba maluk sira iha Dili, no ita fahe mos material desportu ba juventude sira iha Lisadila no Maumeta Likisa nian,’’ afirma Egidio de Jesus.
Lider masimu partidu Frente Mudansa ne’e informa, kooperativa FM estabiliza ona kooperativa hakiak manu iha Fatuahi no fahi 8 distribui ona ba Uailili munisipiu Baukau nian tuir mai sei distribui tan fahi rua ba Maubisse munisipiu Ainaru nian atu nune’e dezenvolve ekonomia uma kain ida-idak iha baze liu husi kooperativa, programa ne’e hahu husi 2018-2021 nian.
Maibe, iha 2022 FM hanoin atu lansa projetu ida iha kurtu prazu atu povu maubere bele menikmati (goja), maske FM ho de’it kadeira ida ho subensaun publiku 92 mill, maibe hakarak gasta osan ne’e hodi hadia netik povu nia moris liu husi fornese bee moos, eletrisidade no estabeliza kooperativa hakiak faho manu hodi liberta povu husi kiak no mukit.
Jornalista : Manuel Andrade
Editor : Agapito de Deus
