Lafaek News–Estudantes Departamentu Komunikasaun Sosiál, Fakuldade Siénsia Sosiá husi Universidade Nasionál Timor Loro sa’e (UNTL), hamutuk nain 4 remata ona estájiu professional iha média online Lafaek News ho durasaun husi loron 01/06/2022 no konklui iha loron 02/08/2022.
Iha serimonia despedida reprezentante estájiarius komunikasaun sosiál UNTL, Filipe Soares hatoo agradecimento ba media lafaek news, tanba bele oferese ona espasu ba estudante nain 4 ne’e hodi hala’o estajiu professional too remata ho rezultadu di’ak.
Ami na’in ha’at Agradese tebes ba estrutura média Lafaek news tanba bele simu ami hodi hala’o ami nia estájiu profesional iha fatin ida ne’e durante fulan rua nian laran”, estajiadu DCS-UNTL, Felipe Soares hafoin hala’o despedida ho estrutura media lafaek news, iha edifisiu LN Bidau Akadiru-hun, foin lalais ne’e.
Nia afirma durante estájiu iha média online Lafaek News iha diferensa tebes, tanba aprende hala’o kna’ar Jornalismu nian, maske materia hirak ne’e hetan iha Universidade Nasional Timor Loro sa’e, maibé prátika laiha, husi estajiu ida ne’e bele aprende prátika ho hala’o kna’ar Jornalismu nian iha terenu.
Iha fatin hanesan, Koordenador Kobertura (KORLIP), Agapito de Deus reforsa katak hakarak sai hanesan ema jornalista professional ba dahuluk domina situasaun jeral iha rai-laran, hafoin hatene projesaun global iha situasaun ohin loron, tanba ema jornalista labele tarde iha situasaun tomak.
Tenke ita-nia aldeia, suku postu no munisipiu,hafoin ita bele hatene tan ba iha aldeia seluk suku seluk no nasaun seluk, la’e Ita ba iha nasaun seluk ema husu situasaun Timor ita la hatene, tanba ne’e hanesan ema jornalista presiza hatene no domina uluk iha ita-nia nasaun foin hatene problema husi nasaun seluk, maibé iha ha’u nia evaluasaun alin na’in ha’at ne’e di’ak, tanba sira iha interese ne’e boot, iha kestaun balun mak presiza hadia más la’os grave liu, ha’u dehan atribui karta professional lafaek news ba sira, tanba sira servisu ho di’ak ho responsabilidade boot bainhira hala’o servisu orientasaun ruma husi redasaun,’’ katak Agapito.
Eis Korlip Timor Post atual Korlip Lafaek News ne’e fo hanoin ba estudante komunikasaun sosial husi UNTL atu jere tempu di’ak atu lee barak, analiza barak ba iha situasau ohin loron iha rai-laran intermu projesaun ekonomia, saude, edukasaun no dezenvolvimentu ein jeral, tanba aban bainhira hala’o ona professaun jornalista ne’e labele dúvidas atu hakerek no análiza.
Apresiasaun ba imi ne’e atu estuda di’ak-liután, tan situasaun ne’e dinámiku sempre troka ba mai, senáriu foun kada loron mosu iha ita rain, entaun tradisaun jornalista kaer metin dimensaun tolu importante hodi sai referénsia ba atividade kobertura loro-loron,’’ katak nia eis Korlip Timor Post ne’e.
Iha sorin seluk Vise-Diretor Departamentu Komunikasaun Sosial (DCS), Roberto Pacheco da Costa, hatoo apresiasaun boot ba media online lafaek news ne’ebé atribui ona kartaun professional ba esajiarius nain hat hodi mantein kobertura permanente ba redasau lafaek news.
Notisia Lafaek News la’os foun ba ha’u, antes ne’e ha’u mos sempre lee notisia média Lafaek News nian, tanba ne’e ha’u kontente tebes-tebes, bainhira rona sira bele duni tuir mandamentu hanesan jornalismo ninian”tenki vize diretor CS-UNTL ne’e.
Vise-Diretor CS-UNTL ne’e hatoo agradese tebes ba instituisaun lafaek news ho ekipa ninia disponibilidade maske, Lafaek News hetan obstákulu boot durante ne’e edifisiu muda ba mai, maibé la soe husik hela estudantes sira no ha responsabilidade hodi akompania estudante nain hat ne’e nia prosesu estájiu too final.
Durante estajiu iha instituisaun ida ne’e sira halo buat ruma la loos, lori departmentu Komunikasaun Sosial nian naran husu perdaun, ne’e mak ita nia oan sira, sira mak futuru Jornalista, klaru katak buat ne’ebé teória sira hetan iha kadeira universitáriu lahanesan ho prátika iha terenu, dala barak ota halo atu hasa’e de’it sira nia koñesimentu maibé iha prátika hasoru buat seluk ida, tanba ne’e agradese ba instituisaun média Online Lafaek News ne’ebé mak akompania estudante estajiadu sira husi inisiu to’o agora,” nia hakotu.
Entretantu, estudantes husi Universidade Nasional Timor Loro sa’e (UNTL) Departamentu Komunikasaun Sosiál hamutuk nain hat (4), kompostu husi Rita Moniz, Felipe Soares, Ângela Carvalho ho Azita Menezes, remata prosesu estajiu iha hafoin hala’o estajiu professional perante fulan rua iha media online lafaek news.tl Bidau Akdiruhun.
Jornalista : Felipe Soares
Asisténsia Editora : Rita Moniz
