Lafaek News-(Kovalima)-Diretór Eskola Sekundaria Geral Publika (ESGP) Suai Franselino Freitas Carvalho apresia ho estudante finalista anu Letivu 2022 nia inistiva hari Gazebo Unidade 12 iha resintu eskola nian hodi halo ilas liu beleza ESGP Suai.
“Hakarak informa katak molok estudante sira halo pondok ne’e, sira informa gabinete no mos ba inan aman katak estudante sira sei husik hela lembransa molok husik hela eskola ida ne’e,mak sira kria pondok kada turma ida, pondok ida ne’e inisiativa husi estudante sira depois mai iha Gabineti diretiva husu mos husi parte inan aman iha inkontru simu kaderneta iha fulan kotuk” Informa Diretór ESGP Suai Franselino Freitas Carvalho ba Lafaek News iha kna’ar fatin semana ne’e.
Diretór ESGP Suai esklarese, estudante sira mak kontribui rasik osan kada ema ida sentavu lima nulu (0,50) hodi sosa material no fasilita hahan no be iha tempu estudante sira hari Gazebo ne’e, no osan ne’e mai husi kontribuisaun inan aman sira, tanba ne’e wainhira estudante sira atu halo atividade ruma mak eskola sei informa mos ba inan no aman sira.
“Lembransa ida husi estudante sira, hakarak hato’o deit ba inan aman katak sa deit mak estudante sira atu halo ne’e inan aman tenki hatene, ne’ebe redus orsamentu husi estudante sira kada ema ida 50 sen, ne’e sira sosa deit sementi ho fasilita sira halo pondok ne’e sira bele han no hemu” Franselino Klarifika
Tanba ne’e Diretór ESGP Suai konsidera idea ne’ebe estudante finalista sira hasaun hodi hari Gazebo ne’e, Idea Briliante hodi rai hela lembransa ba sira nia alin estudante foun ne’ebé sei mai eskola iha ESGP Suai.
“Hakarak agradese ba estudante finalista sira inisia ida ne’e, antes sira husik ESGP Suai sira rai hela mahon ida ba sira nia alin no mos agradese ba inan aman tanba liu husi sira nia apoiu ba inisiativa hari pondok ida ne’e, importante eskola mos agradese tanba inisiativa ne’e mai husi estudante sira” tenik Franselino
Gazebo ne’ebé kakuluk falun ho du’ut no inventa ho sasan uzadu, hanesan taxu parabola ne’e, rin halo ho besi no fondasi haforsa ho rai-henek kahur semente ne’e estudante finalista sira harii iha kada aula ne’ebé eziste iha ESGP Suai hamutuk unidade 12.
No mos Gazebo ne’e hari atu sai hanesan fatin hakmatek ba estudante sira hodi halo konversa no troka hanoin no mos hodi halo ilas liu tan ESGP Suai nia Beleza.
Alende ne’e Profesor da turma sira mos akompaña hodi fo motivasaun ba estudante finalista sira iha prosesu hari Gazebo iha resintu ESGP Suai ne’e.
Jornalista : Jefry RastaQ
Editor : Chamot Nahac
