Lafaeknews- Estudante atus haat limanulu resin rua (452), husi Universidade Nasional Timor Lorosa’e (UNTL), Fakuldade Siénsia Sosiais (FCS) hamutuk 452 sei hala’o Estajiu Servisu Sosiál (ESS) iha Munisipiu tolu kompostu husi Baucau, Vikeke no Lautem.
Dekanu Fakuldade Siènsia Sociais (FCS) Camilo Ximenes, hatete, hili fatin tolu ne’e tanba dook husi area urbana nune’e bele antisipa ba buat ida covid-19 ne’e maka labele haruka estudante sira ba parte norte no sul. Planu fakuldade ka Universidade nian ne’e kada fulan neen tenke estajiu l, entaun tanba situasaun covid neduni la konsege Estájiu ba primeiru simestre. Neduni hili fatin tolu ne’e tanba dook husi área urbana nune’e bele antisipa ba buat ida covid-19 ne’e maka labele haruka estudante sira iha parte norte no sul.
Tanbà ne’e maka agora dadaun inisiu ba segundu simestre ne’e ita foin hahú iha outobru, kuaze estudante ne’ebé maka atu ba Estajiu ne’e 400 ital, fakuldade koloka iha fatin tolu ami eskolla Baucau, Vikeke no Lospalos,” dehan, Dekanu FCS Camilo Ximenes, ba Jornalista sira iha nia kna’ar fatin, hafoin remata Orientasaun ESS ba estudantes tinan akademika 2021, kampus Kaikoli, Segunda-feira (11/0/2021).
Dekanu FCS ne’e informa, estajiu sosiál iha ensinu ne’e iha buat tolu importante ida bolu dehan ensinu, investigasaun no dedikasaun ba sosiedade, tanbá ne’e maka estudante nia papél ne’e oinsa maka atu tranforma sosiedade liu husi halo sosializasaun vasina, bele organiza Joven sira halo toos ka halo natar ka fila liman ne’e mos parte importante ida tranforma sosiedade no fahe esperénsia ne’ebé mak sira iha.
Iha fatin hanesan Xefe Departementu Komunikasaun Sosiál, Marcelino Ximenes Magno akresenta, prezensa estudante sira nian iha Komunidade iha buat rua, ida sira bele ajuda komunidade no sira mós bele hetan buat ruma husi komunidade.
“Ita hanoin katak prezensa sira nian iha komunidade ne’e iha buat rua ida sira bele ajuda komunidade rua sira bele aprende husi komunidade aleinde sira mós lori sira nia matenek skill ba ajuda komunidade sira iha área rurál, sira mós bele valores husi neba lori fali mai ne’e bele hariku tan sira nia kapasidade intelektual,” Subliña Xefe Departamentu CS Marcelino Magno.
Estudante estajiadu Antonio do Santos Loco, hanesan subliña, buat ne’ebé mai sira prepara mak komprende didi’ak sentido husi Estagiu Sosiál no ida-idak hatene nia papél.
“Ami estudante sira prepara komprende didiak sentidu loloos husi Estájiu servisu sosial ne’e, ida-idak hatene nia papèl no serbisu atu halo iha diak nia fatin valor ida ne’ebè importante maka lori no dignifika nafatin almamater UNTL ninia kualidade iha Sosiedade esperansa katak estudante husi FCS ne’e halo buat di’ak,” hakotu Antonio.
Entretantu estudante atus haat limanulu resin rua ne’e (452) ne’ebé atu halo Estájiu ne’e kompleta ona vasinasaun covid-19 no tuir planu estudante sira ne’e sei aranka iha loron 14 fulan ne’e, sei termina iha fulan Dezembru 2021.
Neduni estudantes hirak ne’e kompostu husi Departamentu neen (6) hanesan, Komunikasaun Sosial nain (120), Dezenvolvometu Komunitàriu (94), Administrasaun publika (92) Siénsia Politika (22), Relasaun Internasionál (40), Politika Públika (58) inklui Departementu Inkluzaun (32).
Jornalista: João da Costa Soares
Asisten Editora : Juvita dos Santos
