Lafaek News–Estrada husi postu administrativu Zumalai liga postu administrativu Bobonaru kondisaun grave total hodi difikulta transporte públiku ne’ebé halo movimentasaun ba mai Zumalai-suku Lepo la seguru.
Iha situasaun real akontese asidente iha loron sábadu (11/12/2021) tuku 6 loro-kraik, kareta vaskolante (truk) kòr matak ida, tula sasan kioske nian ho ema nain 8 husi postu administrativu Zumalai munisipiu Kovalima atu ba suku Lepo (Zumalai), maibe la konsege too fatin tarjetu, hafoin too iha Retiluli kareta ne’e Baku fila tanba impaktu husi estrada aat no namdoras.
Delegadu aldeia Retiluli Mauzino Magno, informa, kareta baku fila impaktu husi estrada aat, udan boot mai sai tiha provoka tahu namdoras fo impaktu ba transporte sira atu halo movimentu iha estrada diresaun husi postu Zumalai ba munisipiu bobonaru.
Kareta nee bakufila tanba estrada aat no rai namadoras entaun sae labele mak kareta hakiduk ba kotuk bakufila sorti diak, tanba eletrisidade nia rin ida satan netik kareta ne’e, se lae kareta bakufila too rai hun” dehan delegadu Retiluli ba Lafaek News via telefone, Domingu 12/12/2021.
Delegadu ne’e esplika, horikalan tuku 9 hanesan nee sira foti fali kareta ne’e no konsege ba iha sira nia rezidensia iha suku Lepo.
Iha sorin seluk Komandante Eskuadra Postu Administrativu Zumalai Munisipiu Kovalima, inspetor Polisia Antonio Soares deklara, kareta baku fila iha Retiluli ne’e laiha ema ida mak kanek todan no mate, maibe kondutor moras uituan.
Kareta sae iha Retiluli nian ne’e mak udan halo estrada namadores rezulta kareta baku fila no sira ne’ebé iha kareta laran hamutuk ho motorista total nain 8, maibe sira nia kondisaun diak hotu kondutor mak sente moras uituan,” komandante Zumalai Antonio afirma.
Tuir informasaun ne’ebé lafaek news asesu katak, iha tinan ida ne’e Karte baku fila iha aldeia Retiluli hamutuk 2, ida kareta polisia nian no ida mak vaskolante ne’e nunee mos iha tinan kotuk vaskolante ida baku fila rezulta kondutor ho pasajeiru nain ida lakon sira nia vida.
Jornalista : Orlando Magno
editor : Agapito de Deus
