Lafaek News—Dili, 26 Fevereiru 2024 – Estadus Unidus ho ksolok hatoo parabéns ba Timor-Leste ninia adezaun ba Organizasaun Mundial Komérsiu (OMK). Estadus Unidus apresia persisténsia no rekoñese susesu boot sira ne’ebé halo ona atu kompleta rekerimentu no tempu ba negosiasaun durante tinan 7 nia laran de’it.
Governo Estadus Unidus apoia ho konsistensia esforsu Governu Timor-Leste nian atu adere ba OMK iha aspetu oi-oin, inklui liu hosi atividade importante USAID nian, partikularmente USAID ninia Atividade Governasaun Komérsiu, ne’ebé ajuda Autóridade Aduaneira Timor-Leste hodi moderniza nia sistema komérsiu atu haktuir padraun internasional sira. Apoiu husi USAID nian mos mak hametin transparénsia liu husi inisiativa sira hanesan Portal Komérsiu Aduaneiru.
“Estadus Unidus hatoo parabéns ba Timor-Leste nia adezaun ba OMK, marku importante ida atu nasaun ne’e sai hanesan parseiru global estratéjiku liu,” dehan Enkaregadu Negósiu Embaixada Estadus Unidus iha Dili, Marc Weinstock.
“Adezaun Timor-Leste nian ba OMK hanesan prova ba nasaun ne’e nia dedikasaun no perseveransa. USAID hamrik hamutuk ho Timor-Leste, apoiu nasaun ne’e nia jornada atu hetan futuru ne’ebé abertu, konektadu, no prósperu,” Diretor Interinu Misáun USAID, Mark White hateten.
Governo Estadus Unidus, liu husi USAID, sei kontinua fo asisténsia téknika no kapasitasaun ba Autóridade Aduaneira depois adezaun atu halo alterasaun ba Kódigu Aduaneiru atu kumpri OMK ninia Akordu Fasilitasaun Komérsiu no estabelese Eskritóriu Inkéritu Nasionál.
USAID mós apoiu elaborasaun lei hat ne’ebé tuir OMK ninia rekerimentu atu promove autonomia telekomunikasaun Timor-Leste ninian. Dezenvolvimentu lejizlasaun telekomunikasaun ne’e kritiku ba abilidade Timor-Leste nian atu atrai investimentu relasionadu ho TIK no mós atu aseita ekspansaun servisu ne’ebé iha ligasaun ho TIK.
Kona ba USAID: Liuhusi USAID, Embaixada Estadus Unidus ba Timor-Leste kontribui ona osan hamutuk millaun $92 entre 2021 no 2025, hodi hadi’a ekonomia Timor-Leste nian no promove governasaun di’ak. Dezde restaurasaun Independénsia Timor-Leste nian, USAID kontribui ona millaun $323 resin hodi promove dezenvolvimentu inkluzivu pasífku atu nasaun ne’e prósperu, saúdavel, no autosufisiente. (remata)
