Lafaek News—Ministériu Edukasaun rekoñese Loron 5 fulan Fevereiru 2023, nudar loron komemorasaun ba manorin nain sira hodi kondekora professores 86 ne’ebé dedika an edukasaun jerasaun Timor-oan tomak iha Timor Leste.
Kondekorasaun ne’e sei fó atensaun liu ba manorin na’in sira ne’ebé desempeña ona sira nia servisu durante periodu tolu, konta husi periodu tempu Portugés, tempu Indonézia no tempu Ukun rasik-an.
Ministéru Edukasaun servisu hamutuk ho Diretór Edukasaun Munisípiu sira no mós entidade sira seluk buka tuir informasaun hodi verifika istória, esperiénsia servisu no informasaun sira seluk ne’ebé iha relevánsia ho manorin na’in sira.
“Iha ámbitu Komemorasaun loron Proklamasaun Unilateral Independénsia ba dala-48 tinan ne’e, ba dala uluk Ministériu Edukasaun fó rekuñesimentu hodi kondekora ba Manorin na’in 86, ne’ebé kompostu husi profesora 52 no profesór 34, ho kategória Grau Medalla profesór no profesora hamutuk na’in 35, kategória Grau Medalla Insigna profesór no profesora hamutuk na’in 41, no kategória Medalla Méritu profesora hamutuk na’in 10,” sita iha komunikadu ne’ebé Lafaek News asesu.
ME mós identifika manorin-na’in ne’ebé dedika aan extra-ordinária iha área remota, iha kondisaun laiha transporte, laiha saláriu, laiha matéria eskolár sira seluk hodi apoia, maibé manorin na’in sira ne’e ho Vontade dedikasaun no paixaun tomak hari’i sala eskola rasik no harorin labarik sira la sura tempu no klima.
“Agora dadauk ministériu foin identifika naran na’in rua, husi Postu Maubisse no Postu Laga,” sira komunikadu ne’e.
Governu konsiente katak, sei iha manorin-na’in antigu barak ne’ebé seidauk simu kondekorasaun, no sei iha profesór barak ne’ebé merese simu kondekorasaun tanba sira-nia prestasaun servisu extra-ordináriu iha área remotas.
Tan ne’e, ME sei kontinua esforsu atu rekolla dadus ba profesór/a antigu sira ne’ebé seidauk simu kondekorasaun iha tinan ne’e.
Profesór Kondekoradu, Urbano de Freitas Gaio garadese ba Governu no Xefe Estadu, tanba bele fó ona rekoñesimentu ba sira nia dedikasaun no kontribuisaun iha setór Edukasaun durante tinan barak nia laran.
“Ha’u sente kontente tanba estadu iha vontade ida atu rekoñese ami nu’udar professor ne’ebé servi ba nasaun Timor Leste, no ha’u sente kontente tanba foin primeiravez simu kondekorasaun kona-ba edukasaun nian. Ha’u hanorin falta fulan sanolu tan kompleta tinan 50. Ha’u hahú hanorin ne’e husi 1974 ba 1975,” espresa Professor Urbano de Freitas Gaio, husi Eskola EBC Númeru 1 Tirilolo Baucau.
Estajiada : Epifania I. Pinto
Editór : Agapito de Deus
