Lafaek News—Embaixada Estadus Unidos Amérika (EUS) iha Timor Leste, embaixadór foun, Kevin Blackstone, sesta (19/03/21), ofisialmente entrega karta kredensiál ba Prezidete Repúblika (PR), Francisco Guterres Lú Olo hodi hahú hala’o misaun diplomátika.
“Onra ida ba ha’u hodi aprezenta ha’u nia karta kredensial husi Prezidente Amérika ba Prezidente Francisco Guterres Lú Olo. hanesan ha’u hato’o ba Prezidente katak previléjiu bo’ot ida ba ha’u reprezenta povu no governu Estadus Unidus iha país furak ida ne’e,” dehan embaixadór EUA, Kevin Blackstone, liu husi komunikadu imprensa ne’ebé lafaek news asesu husi medial ofisial embaixada EUA, sesta (19/03/21).
Xefe diplamata EUA Iiha Timor Leste ne’e afirma, nia parte haksolok tebes hodi hahú nia servisu atu apoiu hametin relasaun entre nasaun demokrátika rua EUA-TL, atu prioridade servisu hamutuk ho parseiru Timor-oan apoiu valor no interese komun nian.
“Ha’u haksolok tebes hodi hahu ha’u nia servisu atu apoia hametin relasaun entre ita nia nasaun demokrátiku rua. Ha’u nia prioridade mak servisu hamutuk ho parseiru Timoroan sira atu apoia valor no interese komun sira ne’ebé ita fahe ba malu no atu fo apoiu ne’ebé ami bele fo,” katak Kevin Blackstone.
Estadu Unidus oferese ona apoiu oi-oin ba Timor-Leste liu husi ninia embaixada, USAID, militar, Korpu ba Paz iha area sira hanesan agrikultura, edukasaun, justisa, juventude no ambiente, no Estadus Unidus sei iha apoiu barak tan atu fo.
“Ha’u sei servisu hamutuk mos ho Timora-oan sira atu hetan akordu final no asinatura ba programa Compact husi Millennium Challenge Corporation, introduz no implementa akordu bilateral tinan lima ho Timor-Leste liu husi USAID ho valor millaun $93 no kontinua ami nia komitmentu atu oferese millaun liu $10 atu apoia reabilita Aeroporto Baucau,” katak xefe diplomátika EUA Iha Timor Leste.
Embaixador Kevin Blackstone mak Embaixador EUA ba da-nen dezignadu mai Timor-Leste hafoin estabelesimentu Misaun Diplomátika EUA nian iha tinan 2001.
Antes ninia designasaun mai Timor-Leste, Embaixadór Blackstone halao ona nia knaar hanesan Diretór Ezekutivu iha Gabinete Asuntus Ázia Leste no Pasífiku, Ministru-Konselleiru ba Jestaun Embaixada Estadus Unidus iha Kairo, Ejiptu, no Konselleiru Jestaun ba Estadus Unidus nia Embaixada sira iha Bangkok, Tailandia no Nova Delí, Índia. Embaixadór Blackstone sai hanesan Líder Ekipa ba Estadus Unidus nia Ekipa Rekonstrusaun Provinsiál iha Wasit Irake. Antes ne’e, nia serbi ona hanesan diplomata EUA iha Nijéria, Uganda, Gabon, Itália, Kanada, Índia, no Ejiptu, nia ko’alia Portugese, francês, Italianu no aprende da-daun Tetum.
Media EUA
Editora : Nelya Barros
