Lafaek News—Relasiona ho estadu emerjénsia no serka sanitária ne’ebé kontinua la’o iha kapital Dili no estudante barak hamlaha, tan ne’e Ekipa Servisu Covalima Vitória ho Domin (EKSES Covid-20), organiza estudante Covalima oan hamutuk 79 iha Dili fila ba nia munisípiu Covalima.
Kordenadór Jeral EKSES Covid-20, Mario Tilman, esplika, ho implementsaun serka sanitária iha Dili máka halo estudante sira komesa ona infrenta problema ai-han no laiha ona osan.
“Ho ida ne’e mak EKSES Covid-20 iha hanoin atu hatan ba sira nia preokupasaun ne’e mak ami koko lori sira fila ba Munisípiu, maibé ida ne’e mós ami lá obriga, se mak hakarak fila ami prontu atu fasilita lori sira ba,” hatete koordenador Jeral EKSES Covid-20, Mario Tilman iha Sede Renetil, Sesta, (21/05/2021).
Nune’e mós ,Martinho Gusmão Alves, hanesan koordenador EKSES Covid-20, informa, dadus estudante Covalima oan ne’ebé rekoilla iha kapital Dili durante fulan ida, hatudu katak estudante barak infrenta problema iha ambitu serka sanitária.
“Ami la obriga sira maibé ami fasilita sira oinsá sira hado’ok an husi problema hirak ne’e, no durante ne’e ami organiza sira ba tuir teste swab ona, rezultadu iha tiha mak ami trata fali sira nia dokumentu ba guia de marsa,” Nia afirma.
Nia garantia katak, sei la lori Covid-19 husi Dili ba Covalima tanba antes ne’e sira tuir hotu teste swab, husi SIJK mós autoriza ona sira bele fila ba Munisípiu, sei la kumpri karantina tanba sira iha ona dokumentus teste swab trata ona guia demarsa no hetan ona konsiedarsaun atu ba munisípiu, bainhira to’o iha munisípiu mak família sira mai foti sira ida-idak.
Alende ne’e estudante Cornelia Cardojo, sente orguillu atu fila ba munisípiu tanba durante serka sanitária hasoru problema barak iha Dili.
“Fila ba ha’u nia rai tanba situasaun mak obriga tebes ami, iha serka sanitaria ne’e, ami hasoru problema barak hanesan hamlaha no seluk tan, ha’u sente kontente mós tanba bele sai ona husi situasaun ne’e,” dehan nia.
Enkuantu, transporte ne’ebé fasilita estudante 79 kompostu husi feto 42 no mane 37, atu fila ba munisípiu Covalima apoiu husi emprezariu Covalima ona ne’ebé iha Kapital Dili.
Jornalista : Rita Moniz
Asisten Editór : Pedro de Almeida
