Lafaek News–Situasaun ekonomia uma laran la favorese obriga labarik mane minoridade Oe-kusse oan lakon oportunidade ba eskola hodi mai Dili buka osan liu husi faan naan-kabuar hodi tulun fali inan-aman iha foho moris fatin.
Timor Leste, nasaun ida foin idade joven presiza tebes no sériu priodade investe iha ekonomia nune’e hodi hamoris ekonomia iha baze nune’e bele fo rendimentu ba inan-aman sira iha areas remotas hodi investe oan sira ba edukasaun, maibé situasaun ohin loron ekonomia dulas an iha de’it Dili, pasiénsia inan-aman sira lakon hanoin oinsá oan nia futuru tanba kabun hamlaha pasiénsia esplora labarik sira nia enerjia ne’ebe sei nurak mai Dili faan naan kabuar hodi hetan osan sustenta moris.
Refleta ba Oe-kusse oan Marcos Magno, rekoñese an hodi katak intensaun husi foho mai Dili atu buka osan, tanba laiha servisu seluk ba inan-aman sira hodi hetan osan haruka nia ba eskola.
“Ami husi foho mai sidade Dili atu buka osan hodi hadia moris, maibe servisu laiha obrigatória ami tenki fa’an pentolang hodi hetan netik osan atu bele sustenta moris kada loron no fo eskola ba oan sira, ha’u hanesan aileba oan mai iha sidade Díli atu buka moris, maibe la iha servisu ne’ebe mak atu kontribui ba dezenvolvimentu nasaun nain, hanesan servisu iha kopanha sira atu dezenvolve rai ne’e. Tanba ne’e hau halo negosiu rasik, liu husi fa’an pentolang atu nune’e hau bele hetan netik osan hodi sustenta família loro-loron,” katak Marcos ba lafaek news iha Farol Dili, foin lalais.
Rezultadu faan naan-kabuar (Pentolan), loron ida hetan dolar 30, dala-ruma ema ladún sosa, tanba pentolan iha Dili laran sirkula kintu-kantu, pasiénsia lori-fila ba uma hodi fahe ba labarik sira han.
Marcos Magno husu governu atu neon moris, labele ko’alia polítika ne’ebé laiha asaun, povu presiza servisu hodi hetan osan nune’e bele investe oan ba sir aba eskola hodi kontribui ba dezenvolvimentu iha oin mai.
“Hau nu’udar negosiante apela ba guvernu Timor-leste hodi kria kampu de trabalho ba sidadaun sira ne’ebe hanesan aileba oan, atu nune’e ema hotu bele servisu hodi halo mudansa ba ida-idak nia moris,” Marcos Magno remata.
Jornalista : Octavianos Mala Colo
Editor : Agapito de Deus
