Lafaek News—Tersa (09/03/21), tuku 3 loraik ne’e, ekipa vijilánsia Ministériu Saúde (MS) akompañia husi Polísia Nasionál Timor Leste (PNTL) inklui ekipa Intelijénsia foti tan dadus funsionáriu SEFOPE feto ida inklui nia laen iha aldeia Lurumata hodi hasai teste swab tanba deskonfia kontaktu fíziku ho pasiente husi SEFOPE ne’ebé da-daun baixa hela iha sala izolamentu Vera-Kruz.
Ekipa ne’e’e halo Teste swab funsionáriu SEFOPE na’in rua fen-laen ho nia oan inklui ho familia hamutuk ema na’in-9, hasai sira nia sampel hodi lori ba laboratóriu hodi halo ezame, iha ámbitu teste sampel ne’e familia ne’e koopera di’ak ho ekipa saúde.
Iha fatin hane’esan ekipa vijilánsia mos husu ba komunidade labele pániku no labele halibur malu iha fatin swab ba funsionária SEFOPE ne’ebé identifikadu halo ona kontaktu ho diretora jerál SEFOPE ne’ebé da-daun pozitivu Covid-19 hodi baixa iha sala izolamentu Vera-Kruz
Observasun Jornalista Lafaek News iha Lurumata nota viziñu sira hobur tanba hakfodak derrepente ekipa vijilánsia mosu iha fatin refere hodi halo teste ba funsionária SEFOPE na’in ne’ebé deskonfia halo kontaktu fíziku ho sira nia diretora jerál SEFOPE.
Entretantu, ekipa vijilánsia aviza ba komunidade Lurumata atu labele halo vijilánsia ba familia ne’ebé hetan swab ona ne’e hodi hein rejultadu no husu komunidade sira kontinua mantein distansiamentu fíziku tuir protokolu Ministériu Saúde ho Organizasaun Mundiál Saúde.
Jornalista : Acacio Pinto
Editora : Nelya Barros
