Lafaek News–Ministériu Turizmu Komersiu Industria (MTCI), USAID servisu hamutuk ho parseiru, Heineken Timor S.A no Telkomsel dezenvolve ona aplikasi foun ba viajen GoTimor hodi kontribui ba Turizmu sustentavél no fó benefisiu ba komunidade lokál hodi hasai demanda ba atividades, produtus no eventus turizmu.

Diretór Nasionál Promosaun Turístika no Relasaun Internasionál, Edson Robert Noronha hateten, aplikasaun ne’e sei fasilita implementasaun Polítika Nasionál Turizmu atu estabele plataforma parseria públiku-privada ba markting no promosaun.

Ne’e sei prontu atu ajuda no suporta ami nia Ministériu Turizmu iha ami nia atividade promosaun nian,” dehan Edson Noronha iha sala konferénsia Timor Lodge Dili, kuarta (17/11/21).

Nia hatutan, aspeitu prinsipál husi aplikasaun GoTimor ne’e katak iha ona mapa google ne’ebé bele ajuda vizitante sira atu halo planu di’ak liu ba sira nia viajen no mapa ne’e rasik sei liga sira direitamente ho servisu no produtu turizmu nian iha rai laran ne’ebé sira hakarak asesu.

Reprezentante Telkomsel, Ratbaghavati Bela akresenta, aplikasaun ne’e sei ajuda turista sira atu iha konfiansa bele rezerva restorante ka ótel no produtu ruma iha ne’ebé sira hakarak ba asesu no hela ou vizita bazeia ba referénsia husi vizitante dahuluk nian.

Turista sira sei bele ba vizita ótel ou retorante ida tanba sira konfia ona informasaun vizitante dahuluk no nia impaktu pozitivu mak atu hamoris negosiu turizmu no mellora produtus no servisu sira sai kualidade liu tán,” dehan Nia.

Enkuantu aplikasi ne’e laos gratuita de’it atu uza no download, maibé mós gratuita ba negósiu sira atu alista sira nia servisu no atendimentu no detallu sira. Neduni aplikasi ne’e sei lansa ofisiálmente iha night market Timor Plaza, iha loron 20 fulan novembru 2021, maske aplikasaun ne’e dadaun ne’e eziste ona iha telemovel android atu download.

Entretantu kompaña sira hanesan, Fone Haus, Compass Diving, East Timor Trading (Yellow tail), Air Timor no Dreamer Dive Academy prontu atu oferese dada rifa prémiu ba ema hirak ne’ebé download aplikasi ne’e molok lansamentu ofisiál. Prémiu ne’ebé hetan mak hanesan telefone, tikét gratuita ba Ataúru no seluk-seluk tan.

Jornalista : Juvita dos Santos

Editór         : Agapito de Deus