Lafaek News—Relasaun ho hahalok dosente ida ne’ebe deskonfia halo asediu sexual hasoru nia estudante feto ida iha kareta laran parte diresaun Akanunu Hera, Senádu Universidade da Paz (UNPAZ) foti dezisaun koletiva hodi hatun suspensaun provizoriu ba dosente orientadór ne’e hodi hein prosesu investigasaun.
Magnífiku Reitor Universidade da Paz, Adolmando Soares Amaral hatun lia ba Lafaek News, iha segunda 31 /07/2023, katak dezisaun ne’ebé senadu UNPAZ foti bazeia ba keixa ne’ebé hatoo rasik husi família ho estudante nian ba gabinete Reitoradu nian, husi keixa ne’e universidade liu husi desizaun koletiva deside suspende kedan pesoal dosente ne’e. notisia antes : Deskonfia Dosente Ida halo Asedu Seksual ho Nia Estudante Iha Kareta laran – Lafaek News Lafaek News
“Dezisaun ne’ebé senadu Universidade foti ne’e bazeia ba keixa ne’ebé mai husi família ho estudante refere ne’ebé lori kazu ne’e mai to iha Gabineti Reitoradu nian esplika kronolójia tomak hahú sai husi kampus lao–lao too ba akontesimentu iha Heram,” reitor UNPAZ esplika ba lafaek news iha nia kna’ar fatin UNPAZ Dili Timor Leste, segunda (31/07/2023).
Jestor UNPAZ ne’e fundamenta, razaun husi suspensaun ne’e hodi hein prosesu tomak, tanba família husi estudante nian lori ona kazu refere ba dalan legal, tanba ne’e husi parte senadu Universidade da Paz sei hein rezultadu investigasaun, bainhira dosente ne’e sala duni sei simu demisaun husi universidade rasik.
“Haree buat sira ne’e hotu para labele halo estudante ne trauma no labele fo implikasaun ba sira seluk mak senadu hanoin tenki fo suspensaun depois husik prosesu nee tanba família hodi ona tuir dalan legál ita hein rezultadu investigasaun depois de ida ne’e karik ba ministériu públiku ba tribunal desisaun hanusa bele iha desisaun tuir mai se dosente sala ita bele demite,” reitor ne’e sublina.
Tuir reitor UNPAZ ne’e,parte senádu sei hein rezultadu prosesu husi investigasaun bainhira dosente ne’e sala no sei demite, maibé ohin loron UNPAZ halo ona suspensaun ba dosente ne’e hodi labele ba kampus no labele hanorin no mós sei labele sai dosente orientador inklui la simu nia direitu bensimentu.
Entrentantu estudante ne’ebé mak sai vítima husi parte universidade labele halo suspensaun tanba vítima ne’e rasik ba ho nia deklarasaun ne’ebé fo ba parte polísia nian, no mós parte universidade nian tanba vítima ne’e rasik ho razaun pozitivu.
“Tanba ne’e husi parte universidade nian labele halo suspensaun ba vítima ne’e, rasik vítima ne’e hala’o nia prosesu aprendisajen hanesan bai-bain,” reitor reafirma.
Tanba ne’e Reitor ne’e rasik hateten hanesan reitor tau as nafatin estatutu Universidade da Paz no regulamentu no étika displina sira, maibe ema ida-idak mai ho nia karakter no estudante balun mos seidauk koñsese didi’ak lala’ok ensino superior nian,
Bazeia ba dadus ne’ebé mak fo sai husi Magnífiku Reitor katak estudante ne’ebé sai vítima ba hahalok husi nia orientador, ba da-daun hala’o hela estudu iha UNPAZ hamutuk ho nia maluk estudantes hamutuk rihun 15.
Jornalista : Felix Fernandes
Editor : Agapito de Deus
