Lafaek News–Dezde kolonializasaun Portugésa too ohin Timor Leste independénsia populasaun suku Saburai Postu Administrativu Maliana Munisipiu Bobonaru seidauk sente naroman husi eletrisidade, maibé kompañia balu ambisaun projetu ho ilegal harii besi rin iha komunidade nia let hodi hadau malu ho kompaña seluk.
Xefe suku Saburai, Vicente do Santos informa Komunidade Saburai koñese de’it mak besi rin ne’ebé hamriik dezde 2016 too agora kontinua hamriik kuaze tinan 5 ona, maibé besi rin mak hamriik nafatin fiu rohan ida mós laiha.
“Iha momentu ne’eba kompañia ida ha’u haluhan ona naran tanba kleur ona, sira mai hala’o atividade harii besi rin eletrisidade durante semana ida de’it, parte Ministeriu Obras Públiku hapara kedas sira nia servisu tanba laiha kontratu legal husi governu entaun ita konsidera ne’e Kompañia illegal,” Xefe suku Saburai ba jornalista sira iha Saburai Bobonaru, tersa semana ne’e.
Vicente mós rekoñese progresu dezenvolvimentu iha suku refere hahú husi primeiru governasaun ate VIII governasaun instala ona bee mos sufisiente ba komunidade sira, maibé eletrisidade too agora komunidade seidauk asesu.
“Agora governu loke hela konkursu ba kompañia sira tan ne’e kompañia ne’ebé sai vensedor nia mak sei kaer projetu iha suku ne’e, maibé ami seidauk hatene kompañia ne’ebé atu sai vensedor, tan ne’e ha’u fiar iha tempu besik komunidade sira asesu ona eletrisidade,” Vicente espresa.
Tuir dadus Total uma kain iha suku Saburai hamutuk 713 no populasaun hamutuk 2794, sira ne’e hotu kompostu husi aldeia tolu, Taz masak, Kosal no aldeia Mabilo sira asesu hotu ona bee mos, maibé kona-ba eletrisidade seidauk.
Entretantu tuir observasaun Jornalista Lafaek News nian iha terenu nota katak, durante ne’e komunidade balu uza panel solar no balu uza de’it lilin hodi asesu ba naroman iha tempu kalan.
Jornalista : Orlando Magno
Editór : Agapito de Deus
