Lafaek News–Centro Nacional Chega!I.P. hamutuk ho Ministériu Saúde (MS) asina Nota Entendimentu (Memorandum Of Understanting) ho objetivu atu fó asistênsia saúde ba vítima/sobrevivente konflitu pasadu nian ne’ebé haktuir implementasuan rekomendasaun Chega!. Nota Entendimentu ida ne’e hodi benefisia ba sobrevivente konflitu pasadu ne’ebé oferese sira nia vida tomak ba libertasaun Nasional ne’ebé hela iha Timor-Leste.
Alende ne’e, atu implementa rekomendasaun sira husi Relatóriu Chega! no mós Relatóriu Per Memoriam Ad Spem ne’ebé iha ligasaun ho polítika iha área Solidariedade ba Sobrevivente Vulneravél sira (moras mentál no fíziku) no mós hodi dezeña no implementa atividade sira haktuir iha Rekomendasaun Comissão Acolhimento Verdade E Reconciliação (CAVR) no Comissão Verdade e Amizade (CVA) nian ba Sectór Saúde iha âmbitu fortalesimentu institusionál no dezenvolvimentu polítika no mós programa Ministériu Saúde nian.
Atu implemeta konteúdu husi nota entendementu mak parte rua sei kria mekanizmu fasilitatoria ne’ebé hafasil sobrevivente mais vulneravel sira ba asessibilidade konsultoria no tratamentu Saúde (mentál no fíziku) husi nível nasional to’o iha suku sira ba sobrevivente vulnerável sira husi konflitu polítiku pasadu nian, promove aktu sensibilizasaun ba rekomendasaun sira kona-ba saúde públiku, saúde reprodutivu no Saúde Mentál, apoiu estabelesimentu Sentru Atendimentu ba Rehabilitasaun ba sobrevivente sira no mos dezenvolve hamutuk ho entidade estatal relevante kompetente sira hodi estabelese mekanizmu sira atu bele prezerva aimoruk tradisional sira ne’ebé utiliza durante periúdu rezistênsia hodi fó rekoñesimentu nu’udar patrimóniu istóriku.
Centro Chega! no Ministériu Saúde mos garante katak, sei dezenvolve programa konjuntu liu husi realiza Semináriu, Kolókiu no Publikasaun sira hodi implementa rekomendasaun Chega! relasiona ho sobrevivente vulnerável sira inklui estabelese mekanizmu implementasaun nota entendimentu ida ne’e liu husi akordu tékniku mútua.
Entertantu, nota entendimentu ida ne’e husi parte Ministeriu Saúde (MS) asina tiha ona antes tanba impaktu husi surtu Covid-19 no Centro Nacional Chega!IP asina iha loron Sexta, 03 Setembru 2021, iha edifisiu Centro Nacional Chega!I.P Antigo komarka Balide, Dili no akordu ne’e válidu ba periodu tinan rua (2).
